د کابل ښار د لسو ښوونځیو د استادانو لپاره د زلزلې له خطرونو څخه د خوندیتوب (شېکاوټ) تمرین ترسره شو
له پېښو سره د مبارزې آمادګۍ ملي ادارې او د هستوګنې لپاره د آغاخان مؤسسې (AKAH) د شېک اوټ کمپاین (ShakeoOut) تر نامه لاندې د زلزلې له خطرونو څخه د خونديتوب تمرین د کابل ښار د لسو ښوونځیو د استادانو لپاره ترسره کړ.
د دې تمرین موخه د زلزلې د خطرونو پر وړاندې د استادانو او زدهکوونکو د پوهاوي او چمتووالي کچې لوړول او هغوی ته د زلزلې له رامنځته کېدو څخه مخکې، د پېښې پر مهال او له هغه وروسته د خوندیتوب اړین تدابیر وروښودل و.
د پروګرام په ترڅ کې، له پېښو سره د مبارزې آمادګۍ ملي ادارې استازي، انجینر جلالالدین جمالی د ښوونځیو استادانو ته جامع پرېزنټېشن وړاندې کړ، څو ګډونوال وکولای شي د زدهکوونکو ترمنځ د پوهاوي د لوړولو لپاره اړین معلومات او مهارتونه ترلاسه کړي.
افغانستان د خپل غرني جغرافیایي موقعیت او د طبیعي پېښو پر وړاندې د لوړې زیانمنتیا له امله، دغه ډول تمرینونو او پوهاوي لوړونکو پروګرامونو ته زیاته اړتیا لري، ترڅو د ټولنو د زیانمنتیا کچه راکمه شي.
نېټه:۱۴۴۷/۵/۱۵ هـ ق
له پېښو سره د مبارزې آمادګۍ ملي اداره
