د پکتیکا ولایت له پېښو سره د مبارزې آمادګۍ ریاست په وازېخوا او ګومل ولسوالیو کې د څو وقایوي پروژو تخنیکي سروې وکړه
د پکتیکا ولایت له پېښو سره د مبارزې آمادګۍ ریاست انجنیري او نشراتي ټیم د وازېخوا او ګومل ولسوالیو ته د سفر پر مهال، د پېښو له خطرونو څخه د زیانونو د کمولو د څو وقایوي پروژو تخنیکي سروې او څارنه ترسره کړه.
د دې سفر په ترڅ کې، د وازېخوا ولسوالۍ د شامردان په کلي کې د یوه سربند تخنیکي سروې ترسره شوه. همدارنګه، د ګومل ولسوالۍ د شاوزې په کلي کې د یوه استنادي دېوال تخنیکي سروې وشوه او د پروټانو په کلي کې د یوه کاریز د پاکولو له بهیر څخه هم لیدنه وشوه؛ د دغه کاریز د پاکولو لګښت د پکتیکا ولایت له پېښو سره د مبارزې آمادګۍ ریاست له لوري ورکول کېږي.
همدارنګه، د پروټانو کلي د کاریز د ساتنې او د احتمالي زیانونو د مخنیوي په موخه، د یوه استنادي دېوال د جوړولو تخنیکي سروې هم ترسره شوه، چې ټاکل شوې ده په نږدې راتلونکي کې یې د جوړولو چارې پیل شي.
د سیمې اوسېدونکو له پېښو سره د مبارزې آمادګۍ ریاست له اقداماتو او همکاریو هرکلی وکړ او په خپلو سیمو کې یې د ورته پروژو او مرستو د زیاتېدو غوښتنه وکړه. پاینده خان، چې د سیمې له اوسېدونکو څخه دی، د دغه ریاست له همکاریو څخه مننه وکړه او د ورته اقداماتو د دوام او پراختیا غوښتنه یې وکړه.
