د کونړ ولايت له پېښو سره د مبارزې آمادګۍ رياست په اسمار ولسوالۍ کې د خوړونو د پاکولو چارې پيل کړې
له پېښو سره د مبارزې آمادګۍ ملي ادارې د لوی رئیس، محترم الحاج ملا نورالدین ترابي د لارښوونې پر بنسټ چې د يادې ادارې ټولو ولايتي رياستونو ته يې د خوړونو د پاکولو لارښوونه کړې وه، د کونړ ولايت له پېښو سره د مبارزې آمادګۍ رياست په اسمار ولسوالۍ کې د خوړونو د پاکولو کار رسمآ پيل کړ.
د دې پروژې د پرانيستې په مراسمو کې د کونړ ولايت له پېښو سره د مبارزې آمادګۍ رئيس، مولوي محمد مبين مفتون عمر، د اسمار ولسوال او د سيمې يو شمېر مشرانو ګډون کړی و.
ياده پروژه د سېلابونو له احتمالي خطرونو څخه د مخنيوي، د هستوګنيزو کورونو، کرنيزو ځمکو او عامه المنفعه تاسيساتو د خونديتوب په موخه پلي کېږي. دا بهير تر دې وړاندې د نرګ، غازيآباد او ډانګام ولسواليو کې هم عملي شوی و او ټاکل شوې ده چې په ياد ولايت کې د ټولو اوبو لارو او خوړونو د پاکولو لړۍ دوام ومومي.
نیټه: ۱۴۴۷/۰۹/۱۲ هـ ق
له پېښو سره د مبارزې آمادګۍ ملي اداره
