د کونړ ولایت له پېښوسره د مبارزې آمادګۍ ریاست ۵۰ زیانمنو کورنیو ته غیرخوراکي او نغدي مرستې ووېشلې
له پېښو سره د مبارزې آمادګۍ ملي ادارې او د همکارو بنسټونو ترمنځ د هوکړه لیکونو له مخې، د کونړ ولایت له پېښو سره د مبارزې آمادګۍ ریاست د یادې ادارې تر چتر لاندې او د کډوالۍ نړیوال سازمان (IOM) په مالي همکارۍ، له سروې وروسته د دې ولایت په بېلابېلو ولسوالیو کې د وروستیو ورښتونو له امله زیانمنو شوو کورنیو ته غیرخوراکي او نغدي مرستې ووېشلې.
په دې لړ کې، ۳۴ زیانمنو کورنیو هرې یوې ته د سرپناه د جوړولو یو بسته او ۸،۵۰۰ افغانۍ نغدي مرسته د کډوالۍ نړیوال سازمان له لوري ووېشل شوه. همدارنګه له دغو کورنیو څخه ۱۳ هغو کورنیو ته، چې کورونه یې ډېر زیانمن شوي وو، هرې کورنۍ ته یو باب خېمه هم ووېشل شوه.
همداراز، د یادو کورنیو په ګډون، ټولو ۵۰ زیانمنو کورنیو ته د PU-AMI مؤسسې له لوري هرې کورنۍ ته یو د روغتیا ساتنې بسته هم ووېشل شوه.
نېټه: ۱۴۴۷/۸/۲۴ هـ ق
له پېښو سره د مبارزې آمادګۍ ملي اداره
