د کونړ ولایت له پېښو سره د مبارزې آمادګۍ ریاست په اسمار ولسوالۍ کې د سیلاب له خطر سره مخ پل او استنادي دیوال د ترمیم او د خوړ پاکولو کار پیل کړ
له پېښو سره د مبارزې آمادګۍ ادارې د لوی رئیس، محترم الحاج ملا نورالدین ترابي، د لارښوونې پر بنسټ د کونړ ولایت له پېښو سره د مبارزې آمادګۍ ریاست د اسمار ولسوالۍ د زوړ اسمار په سیمه کې د سیلابونو د خطرونو د کمولو په موخه د یوه خوړ د پاکولو او له ګواښ سره مخ پل او استنادي دیوال د ترمیم عملي چارې پیل کړې.
یاده پروژه د سیمې د اوسېدونکو د ځان او مال د خوندیتوب، د سیلابونو د احتمالي زیانونو د مخنیوي او د عامه زیربناوو د ساتنې په موخه پلې کېږي. د دې پروژې لومړنۍ تخنیکي سروې څه موده وړاندې ترسره شوې وه او د سروې د موندنو او اړتیاوو له ارزونې وروسته یې د پروژې عملي کار پیل شو.
د پروژې د پلي کولو لپاره له پېښو سره د مبارزې آمادګۍ ادارې له لوري ۶۰۰ لیټره تېل ځانګړي شوي دي. په دې پروژه کې د خوړ پاکول، د استنادي دیوالونو ترمیم او د سیلابي اوبو له خطر سره مخ د پل د ساتنې او ترمیم چارې شاملې دي. تمه کېږي چې د پروژې له بشپړېدو وروسته به د سیمې ګڼ شمېر کورونه، کرنیزې ځمکې او عامه تاسیسات د سیلابونو له ګواښ څخه خوندي شي او د خلکو د تګ راتګ اسانتیا به هم برابره شي.
د کونړ ولایت له پېښو سره د مبارزې آمادګۍ رئیس مولوي محمد مبین (مفتون عمر) ویلي، چې د یاد ریاست په هڅو د ولایت په نورو ولسوالیو کې هم د وقایوي او د خطرونو د کمولو پروژو د پلي کېدو لړۍ دوام لري، څو د طبیعي پېښو د زیانونو کچه راټیټه او د خلکو ژوند، شتمني او عامه زیربناوې خوندي وساتل شي.
نېټه:۱۴۴۷/۱۲/۳۰ هـ ق
له پېښو سره د مبارزې آمادګۍ اداره
