د کډوالو د نړیوال سازمان رئیسي، د خوړو د نړیوال پروګرام رئیسي، او د UNICEF رئیس په تورخم کې د اجباري اېستل شوو کډوالو لپاره له پېښو سره د مبارزې آمادګۍ ملي ادارې لخوا د جوړ شوي پنډغالي څخه لیدنه وکړه
نن ورځ شنبه له غرمې وروسته د کډوالو د نړیوال سازمان (IOM) رئیسي اغلي میا پارک، د خوړو د نړیوال پروګرام (WFP) رئیسي اغلي موټنتا، د UNICEF رئیس تا ج الدین،
او د ملګرو ملتونو د کډوالو د عالي کمېشنرۍ (UNHCR) او د OCHA استازو د خپلو مل پلاوو سره يوځای له پېښو سره د مبارزې آمادګۍ ملي ادارې د سرپرست الحاج ملا نورالدین ترابي په شتون کې په تورخم کې د اجبري اېستل شوو کډوالو لپاره د یادې ادارې لخوا د جوړ شوي پنډغالي څخه لیدنه وکړه.
په دې لیدنه کې ترابي صاحب د پنډغالي د بېلابېلو برخو په اړه معلومات ورکړل او څرګنده یې کړه چې د پنډغالي د جوړېدو چارې لا تر اوسه بشپړې شوې نه دي خو هڅې دوام لري څو د معیاري پنډغالي په جوړولو سره کډوالو ته لا ډېرې اسانتیاوې برابرې شي.
نوموړي زیاته کړه چې موږ په دې پنډغالي کي څه دپاسه ۴۰۰ معیاري خیمې لګولي دي او ټولي اسانیتاوي مو ورته برابري کړي دي همداراز د کډوالو د امنیت ساتلو لپاره موږ پر ټول کمپ باندي سیم خاردار را ګرزولی دی.
د ادارې سرپرست د کډوالو د شمېر د زیاتوالي ته په اشارې سره وویل چې د مرستندویه سازمانونو لپاره زمینه برابره شوې ده څو خپلې مرستې په چټکۍ او شفاف ډول کډوالو ته ورسوي.
په دې دوام کې د کډوالۍ نړیوال سازمان رئیسي د ترابي صاحب دپوره معلوماتو ورکولو څخه مننه وکړه او ویې ویل خوشحاله یم چې دا ځل مو دلته د کډوالو په پنډغالي کې سره ولیدل اغلي وویل چې موږ د کډوالو د وضعیت ارزونه کوو ترڅو هغوی ته لا ډېرې مرستې برابرې کړو.
نېټه: ۱۴۴۶/۱۰/۲۱ هــ ق
له پېښو سره د مبارزې آمادګۍ ملي اداره
