له پېښو سره د مبارزې آمادګۍ ملي ادارې او د بشري مرستو د همغږۍ مؤسسې ترمنځ د ګډو همکاریو تفاهمنامه لاسلیک شوه
نن د چهارشنبې سهار، له پېښو سره د مبارزې آمادګۍ ملي ادارې لوی رئیس، محترم الحاج ملا نورالدین ترابي، په خپل کاري دفتر کې د بشري مرستو د همغږۍ مؤسسې (OCHR) له اجرائیوي رئیس انجنیر عبدالبصیر حقمل سره وکتل او د ګډو همکاریو تفاهمنامه یې ورسره لاسلیک کړه.
محترم ترابي صاحب وویل، څرنګه چې دا پروژه د ژمنیو مرستو پورې اړه لري، نو لازمه ده چې په چټکۍ سره د پلي کېدو لپاره جدي هڅې وشي، تر څو خلک وکولای شي پر وخت ترې ګټه واخلي.
همدارنګه، د یادې مؤسسې رئیس عبدالبصیر حقمل د روانې پروژې په اړه معلومات وړاندې کړل، د پخوانیو همکاریو له امله یې له ترابي صاحب څخه مننه وکړه او زیاته یې کړه چې د مرستو د وېش پر مهال به شفافیت او چټکتیا په پام کې ونیول شي.
په پای کې د دواړو لوریو ترمنځ ټولټال د شپږ نوي زره (۹۶,۰۰۰) ډالرو په ارزښت د ګډو همکاریو تفاهمنامه لاسلیک شوه، چې له مخې به یې یاده مؤسسه د کونړ ولایت په نورګل او څوکۍ ولسوالیو کې د زلزلې له امله زیانمنو شویو ۴۰۰ کورنیو ته د ژمنیو مرستو بستې ووېشي او په هره بسته کې به پنځه تختې کمپلې، دوه جوړه د لويانو پشمي جمپرونه، پنځه جوړه د ماشومانو پشمي جمپرونه، دوه د ښځو پشمي چادرونه، دوه د نارینهوو پشمي پټو، دوه جوړه د لويانو بوټان، څلور جوړه د ماشومانو بوټان، دولس جوړه د لويانو او ماشومانو جورابې، څلور جوړې د ماشومانو دستکشونه او څلور د ماشومانو ګرمې خولۍ شاملې وي، همدارنګه د پوهاوي بنرونه او بروشورونه به هم چاپ شي.
نېټه:۱۴۴۷/۷/۲۴ هـ ق
له پېښو سره د مبارزې آمادګۍ ملي اداره
