له پېښو سره د مبارزې آمادګۍ ملي ادارې د مالي او اداري عمومي رئیس د اسلام قلعه په پوله کې له ایران څخه په اجباري توګه د را ایستل شویو کډوالو د لنډ مهاله استوګنې لپاره د دې ادارې لخوا د جوړ شوي پنډغالي څخه لیدنه وکړه
نن ورځ د شنبې په سهار، له پېښو سره د مبارزې آمادګۍ ملي ادارې د مالي او اداري عمومي رئیس؛ محترم الحاج مولوي محمد علم عالمیار، هرات ولایت ته د خپل سفر په ترڅ کې د هرات ولایت په اسلام قلعه پوله کې له ایران څخه په اجباري توګه د را ایستل شویو کډوالو د لنډ مهاله استوګنې لپاره د جوړ شوي پنډغالي څخه لیدنه وکړه.
محترم عالمیار صاحب د پنډغالي د لیدلو په ترڅ کې، له اړوند مسؤلینو څخه د پنډغالي د کار د پرمختګ د راپور د اورېدو ترڅنګ هغوی ته د پر وخت کار بشپړولو، د منظمو او اغېزمنو خدماتو د وړاندې کولو لپاره اړینې لارښوونې وکړې او همدارنګه یې هغوی له اجبارې ایستل شویو کډوالو سره نېک او مهربانه چلند ته وهڅول.
هغه د خپلو خبرو په یوه برخه کې، له مرستندویه بنسټونو څخه مننه وکړه او د کډوالو خدمت کول یې لوی اجر یاد کړ او ویې ویل، چې له پېښو سره د مبارزې آمادګۍ ملي ادارې کارکوونکي ۲۴ ساعته خلکو ته د مرستو رسولو لپاره چمتو دي او د دې پنډغالي د جوړولو چارې په بشپړېدو دي .
نیټه: ۱۴۴۷/۰۲/۰۱ هـ ق
له پېښو سره د مبارزې آمادګۍ ملي اداره
