له پېښو سره د مبارزې آمادګۍ ملي ادارې سرپرست د بېړنۍ سرپناه او غیرخوراکي مرستو د کلستر له پلاوي سره وکتل

نن ورځ د سه‌شنبې په سهار، له پېښو سره د مبارزې آمادګۍ ملي ادارې سرپرست الحاج ملا نورالدین ترابي، د IOM  دفتر د کلستر همغږي کوونکې ساوسن سعد، د UNHCR دفتر د کلستر همغږي کوونکې آریرین موتیف، او د IOM دفتر د کلستر مرستیال محمد هاشم نیازی سره په کاري دفتر کې وکتل او خبرې وکړې.
په دې ناسته کې، ترابي صاحب د کلستر پلاوي ته ښه راغلاست ووېل او څرګنده یې کړه چې طبیعي پېښې هر کال خلکو ته د پام وړ مالي او ځاني زیانونه اړوي، او د دې پېښو د خطرونو د کمولو لپاره د وقایوي پروژو پلي کول ډېر اړین دی.
نوموړي زیاته کړه چې له پېښو سره د مبارزې آمادګۍ ملي اداره د خپلو مسئولیتونو پر بنسټ، د پېښې په بېلابېلو پړاوونو کې چې وقایه، چمتووالی، رسېدنه، او بیا رغونه پکې شامل دي، زیانمنو ته مرستې رسوي. هغه د یادو کلسترونو له استازو وغوښتل چې په ټولو یادو پړاوونو کې همکاري وکړي.
د ادارې سرپرست همداراز د کلستر سره پر همغږۍ او د همکاریو پر پراخولو ټینګار وکړ او ډاډ یې ورکړ چې دا اداره به د کلستر سره په ټولو برخو کې لازمې همکارۍ وکړي.
ورپسې، آریرین موتیف د UNHCR دفتر د کلستر همغږې کوونکې، له پېښو سره د مبارزې آمادګۍ ملي ادارې سرپرست له همکاریو مننه وکړه او ویې ویل چې کلستر په بېړنیو حالاتو کې بشري مرستو، د کورونو پر ترمیم او بیا رغونې تمرکز لري. هغه د امریکا د نړیوالې پراختیا ادارې (USAID) له لوري د بشري مرستو د بندېدو له امله رامنځته شویو ستونزو ته هم اشاره وکړه.
په همدې حال کې، ساوسن سعد دIOM  دفتر د کلستر همغږې کوونکې، د ۲۰۲۵ کال لپاره د کلستر د پروګرامونو د چمتووالي، اړتیاوو، سرچینو، او زیانمنو ته د مرستو رسولو پر څرنګوالي خبرې وکړې. نوموړې وویل چې یاد پلان د ملګرو ملتونو د معیارونو او ترسره شویو ارزونو پر بنسټ ترتیب شوی او په ۲۰۲۵ کال کې به پلی شي.
میرمن سعد همداراز د پسرلي سېلابونو د خطرونو یادونه وکړه او وویل چې بشري مرستې په ستراتیژیکو ګدامونو کې زېرمه شوې دي، ترڅو د بیړنیو حالاتو پر مهال زیانمنو ته ووېشل شي.
په پای کې، دواړو لوریو د پېښو د مدیریت په برخه کې د همغږۍ او ګډ کار پر ارزښت ټینګار وکړ او هوکړه یې وکړه چې د افغانستان په کچه د ټولو فعالو کلسترونو له استازو جوړ یو ګډ کاري ګروپ به جوړ کړي.

نېټه:۱۴۴۶/۸/۲۷
له پېښو سره د مبارزې آمادګۍ ملي اداره