له پېښو سره د مبارزې آمادګۍ ملي ادارې سرپرست د داکار موسسې له مسؤلینو سره وکتل

نن ورځ یکشنبه وروسته له غرمې، له پېښو سره د مبارزې آمادګۍ ملي ادارې سرپرست، الحاج ملا نورالدین ترابي د داکار موسسې د همغږۍ او تخنیکي برخې له رئیس انجنیر عبدالولي مصلح، د پروپوزل له مسؤل، هارون بشیري، د اړیکو له مسؤل فریدالله او د دې موسسې د بیړنیو حالاتو له سلاکار امیر حسین سره وکتل.
په دې کتنه کې، ترابي صاحب د داکار موسسې پلاوي ته ښه راغلاست ووايه او ويې ويل، چې افغانستان په مختلفو برخو او مختلفو ولايتونو کې مرستو ته اړتيا لري. دا چې نړۍ له موږ سره په مستقیم ډول مرسته نه کوي، نو موږ به د افغانستان له خلکو سره د مرستې په موخه موسسو ته پوره آسانتیاوې برابرې کړو.
له پېښو سره د مبارزې آمادګۍ ملي ادارې سرپرست زياته کړه، چې دغه اداره په پنځو څانګو وېشل شوې ده، چې عبارت دي له: مخنيوى، چمتووالى، رسېدنه، د پېښو د خطرونو کمول او د بيارغونې چارې او تر ټولو مهم يې د پېښو مخنيوی دى، چې د ځاني او مالي خطرونو کچه تر ډېره کموي. هغه همداراز وویل، چې موږ په خپل ډیټابیس کې د خطر سره د مخ سیمو په اړه معلومات لرو او زموږ انجینران دا مهال په ولایتونو کې د زیان منونکو سیمو د معلومولو د سروې په موخه کلي په کلي مصروف دي او په هر ولایت کې چې تاسو کومه پروژه لرئ له تاسو او نورو بنسټونو سره پوره همکارۍ ته چمتو یو.
په همدې حال کې، انجینر عبدالولي مصلح او همکارانو یې د خبرو کولو په پار له وخت ورکولو مننه وکړه او د داکار موسسې په اړه یې معلومات وړاندې کړل، ویې ویل چې دا موسسه د کرنې، اوبو لګولو، روغتیاساتنې، د اوبو رسولو شبکې او د پېښو د مدیریت په برخو کې کار کوي. هغه زیاته کړه، موږ اوس پر یوې پروژې کار کوو چې تمویل کوونکي یې اروپايي ټولنه ( ایکو ) ده او موخه یې د طبیعي پېښو پر وړاندې د خلکو د چمتووالي کچه لوړول دي.
ښاغلي مصلح وویل، څرنګه چې د دې پروژې سکټور له پېښو سره د مبارزې آمادګۍ ملي اداره ده، نو موږ غواړو چې ستاسو د وړاندیزونو له مخې خپل پروپوزل ډیزاین او چمتو کړو، ترڅو په راتلونکي کې وکولای شم پروژه په ښه او مؤثره توګه تطبیق کړم.

نېټه: ١٤٤٦/١٠/٢٩ هــ ق
له پېښو سره د مبارزې آمادګۍ ملي اداره