له پېښو سره د مبارزې آمادګۍ ملي ادارې سرپرست د کابل ولایت په پایتخت ترمینل کې د کډوالو له پنډغالي څخه لیدنه وکړه

نن د سه شنبې ورځ له غرمې وروسته، له پېښو سره د مبارزې آمادګۍ ملي ادارې سرپرست، محترم الحاج ملا نورالدین ترابي، د کابل ولایت په پایتخت ترمینل کې د کډوالو له پنډغالي څخه لیدنه وکړه. د دې لیدنې موخه له ګاونډیو هېوادونو څخه په اجباري توګه را اېستل شویو کډوالو د اوسني وضعیت ارزونه، د دوی د بېړنیو اړتیاوو او ننګونو پېژندنه، او ستونزو ته د بیړنۍ رسېدنې لپاره د پلان جوړول وو.
په دې لیدنه کې، له پېښو سره د مبارزې آمادګۍ ملي ادارې سرپرست, له کډوالو سره له نږدې ولیدل، د دوی ستونزې، ننګونې او وړاندیزونه یې واورېدل، او د دوی د ژوند وضعیت، بشري اړتیاوې، موجود امکانات او جدي کمښتونه، په ځانګړي ډول د بیړنۍ سرپناه، د څښاک پاکو اوبو، روغتیايي خدمتونو او نورو اساسي سهولتونو په اړه معلومات ترلاسه کړل.
محترم ترابي صاحب څرګنده کړه چې له پېښو سره د مبارزې آمادګۍ ملي اداره ځان مکلف ګڼي چې د زیان‌منو هېوادوالو، په ځانګړي ډول د کډوالو ترڅنګ ودرېږي، او د کورنیو سرچینو د بسیج او د نړیوالو بنسټونو په همکارۍ، د دغو کډوالو د ژوند د شرایطو د ښه والي لپاره بېړني اقدامات تر سره کړي.
نوموړي همداراز ټینګار وکړ چې د دې پنډغالي ټولې نیمګړتیاوې او اړتیاوې به ژر تر ژره په هر‌ اړخیز ډول و ارزول شي او رسېدنه به ورته وشي، ترڅو کډوال وکولای شي په درناوي سره خپلو اصلي سیمو ته انتقال شي.
له پېښو سره د مبارزې آمادګۍ ملي اداره ژمنتیا لري, چې د ملي او نړیوالو بنسټونو سره په همغږۍ به د کډوالو د هوساینې، ملاتړ او وضعیت ته د رسېدنې لپاره لازم او عملي اقدامات ترسره کړي.
 
نېټه: ۱۴۴۷/۰۱/۱۲ هـ ق
له پېښو سره د مبارزې آمادګۍ ملي اداره