له پېښو سره د مبارزې آمادګۍ ملي ادارې سرپرست د کاپیسا ولایت له پېښو سره د مبارزې آمادګۍ له ریاست څخه لیدنه وکړه

نن ماسپښین، د چهارشنبې په ورځ، له پېښو سره د مبارزې آمادګۍ ملي ادارې سرپرست الحاج ملا نورالدین ترابي، کاپیسا ولایت ته د خپل سفر په ترڅ کې د یاد ولایت له پېښو سره د مبارزې آمادګۍ ریاست له کارکوونکو سره د هغوی د ستونزو, نظرونو او وړاندیزونو د اورېدو په موخه وکتل. 
په دې کتنه کې، د ادارې سرپرست  د یاد ریاست له هر کارکوونکي سره په جلا جلا توګه وکتل او د هغوی وړاندیزونه او ستونزې یې واورېدې او د حل لپاره یې د همکارۍ ډاډ ورکړ.
ترابي صاحب د کاپیسا ولایت له  پېښو سره د مبارزې آمادګۍ ریاست کارکوونکو ته ووېل چې د مراجعینو سره نیک چلند، د کارونو پر وخت او بې له ځنډه ترسره کول، د بیت المال په سمه توګه کارول او اداري اصول مراعاتول باید په جدي توګه پام کې ونیسي. همداراز، نوموړي له هغوی وغوښتل چې د ولس ریښتیني خدمت کوونکي واوسي او د هېواد د پرمختګ او ښېرازۍ لپاره خپله ټوله انرژي او مسلکي پوهه په سمه توګه وکاروي.
په پای کې، د کاپیسا ولایت له  پېښو سره د مبارزې آمادګۍ ریاست کارکوونکو د ادارې له سرپرست څخه د دوی د حال احوال اخیستلو او د ستونزو د اورېدو له امله مننه وکړه. همداراز، هغوی ډاډ ورکړ چې د ادارې د مشرتابه د لارښوونو او پریکړو سره سم به خپل کاري پلانونه   لا په ښه توګه عملي کړي.

نیټه: ۱۴۴۶/۸/۲۰
له پېښو سره د مبارزې آمادګۍ ملي اداره