له پېښو سره د مبارزې آمادګۍ ملي ادارې سرپرست په خپل کاري دفتر کې د روسیې هېواد د سفارت د جنرال قونسل سره وکتل

 نن ورځ پنج شنبه, له پېښو سره د مبارزې آمادګۍ ملي ادارې سرپرست, الحاج ملا نورالدین ترابي, په افغانستان کې د روسیې هیواد د سفارت له جنرال قونسل روسلان عثمانوف او د قونسلي چارو همکار الکسانډر سره په خپل کاري دفتر کې وکتل.
 ترابي صاحب, لومړی راغلي پلاوي ته ښه راغلاست وویل او د یاد پلاوي سره یې د ګڼ شمیر موضوعاتو لکه, د طبیعي او طبیعي پیښو، بشري مرستو او نورو اړوند یې مسایلو په اړه خبرې وکړې.
همداراز ترابي صاحب وویل, چي دا هم یو ستر پرمختګ دی چې موږ د بېلابېلو هیوادو سره سیاسي، اقتصادي، او مذهبي اړیکې لرو او باید دواړه هیوادونه هڅې وکړي چې خپلې اړیکې پیاوړي او دوامداره وساتي، ترابي صاحب د بېړنیو حالاتو پر مهال، د خطرونو د مدیریت، د اقلیمي بدلون، د وقایوي پروژو، د ظرفیت لوړونې، خوراکي او غیر خوراکي مرستو په برخه کې د همکاري غوښتنه وکړه.
ترابي صاحب راغلو استازو ته ډاډ ورکړ چې موږ  به ستاسو هر ډول ستونزې داصولو له مخې حل کړو.
 وروسته د افغانستان لپاره د روسیې سفارت جنرال قونسل, ښاغلي روسلان عثمانوف, له پیښو سره د مبارزې آمادګۍ ملي ادارې له سرپرست څخه د کتنې لپاره د زمینې برابرولو په پار ځانګړې مننه وکړه او د افغانستان سره یې د خپل هېواد د همکاریو یادونه وکړه او ویې ویل چې موږ د افغانستان سره سیاسي، اقتصادي او مذهبي اړیکې لرو او زموږ اړیکې تر بل هر وخت د پیاوړي کېدو په حال کې دي.
ښاغلي عثمانوف زیاته کړه چې په روسیې هېواد کې د بېړنیو حالاتو اداره شتون لري او موږ هڅه کوو چې ستاسو او د هغې ادارې ترمنځ اړیکې پیاوړې کړو.
په پای کې دواړو خواوو په بېړنيو حالاتو، د بشري مرستو پر رسونې, د اړیکو پر پراختیا او د پېښو مدیریت په برخه کې د همکاریو او همغږۍ پر زیاتولو ټینګار وکړ.

۱۴۴۶/۱۲/۲۹  هــ ق 
له پیښو سره د مبارزې آمادګۍ ملي اداره