له پېښو سره د مبارزې آمادګۍ ملي ادارې لوی رئیس د ادارې د لا ښه والي لپاره د ټولو کارکوونکو وړاندیزونه واورېدل

په تېرو څو ورځو کې، له پېښو سره د مبارزې آمادګۍ ملي ادارې لوی رئیس، محترم الحاج ملا نورالدین ترابي د دې ادارې د ټولو کارکوونکو طرحې، وړاندیزونه، ستونزې او نظرونه د رئیسانو له کچې څخه تر خدماتي کارکوونکو پورې په خپل دفتر کې  په جلا جلا توګه واورېدل.
په دې لړۍ کې، د ادارې لوی رئیس له هر کارکوونکي سره په جلا جلا ډول وکتل او په دقت سره د هغوی د نظرونو او ستونزو اورېدو ترڅنګ یې ټینګار وکړ چې په اداره کې باید لا اغېزمن، شفاف او مسؤل کاري چاپېریال رامنځته شي. د دې اقدام موخه د خدماتو د وړاندې کولو د بهیر ښه کول، د اداري او تخنیکي ظرفیتونو پیاوړتیا او په ټولو برخو کې د لا زیاتې همغږۍ رامنځته کول دي.
محترم ترابي صاحب څرګنده کړه، چې د کارکوونکو نظرونه او ګډون د چارو د اصلاحاتو او نوښتونو لپاره ځانګړې ارزښت لري او د ادارې مشرتابه هڅه کوي چې ټولې برخې د اړتیاوو او کاري شرایطو پر بنسټ پیاوړې کړي. نوموړي زیاته کړه چې د کارکوونکو عملي او اغېزمن وړاندیزونه به د ادارې په تګلارو، تطبیقي پلانونو او کاري نظام کې ځای ومومي.
د ادارې کارکوونکو هم له دې بهیر څخه د خوښي څرګندولو ترڅنګ، په تخنیکي، اداري، د خدماتو وړاندې کولو، د تجهیزاتو برابرولو او د همغږۍ د ښه والي په برخه کې خپلې ځانګړې ستونزې او نظرونه شریک کړل او د ادارې د مشرتابه له پاملرنې یې مننه وکړه.
د یادونې وړ ده، چې د ادارې لوی رئیس، څه موده وړاندې هم ولایتونو ته د سفر پر مهال د دې ادارې په ولایتي ریاستونو کې ورته پروګرام پلي کړی و او د ولایتي کارکوونکو وړاندیزونه یې هم اورېدلي وو.

نېټه: ۱۴۴۷/۰۴/۱۳ هـ ق
له پېښو سره د مبارزې آمادګۍ ملي اداره