له پېښو سره د مبارزې آمادګۍ ملي ادارې پلاوي د افغانستان لپاره د قزاقستان له سفیر سره د تورغنډي په بندر کې وکتل
د هرات ولایت له پېښو سره د مبارزې آمادګۍ رئیس, مولوي محمد موسی اشعري او د دې ادارې د بهرنیو اړیکو آمر برهانالدین شینواری، د تورغنډي په بندر کې د قزاقستان هېواد د خوراکي او غیر خوراکي مرستو د ترلاسه کولو په څنډه کې د افغانستان لپاره د قزاقستان هېواد له سفیر ښاغلي ګازیس اکباسوف سره وکتل.
په دې لیدنه کې له پېښو سره د مبارزې آمادګۍ ملي ادارې پلاوي, د دې ادارې د لوی رئیس, محترم الحاج ملا نورالدین ترابي د قدردانۍ پیغام له سفیر سره شریک کړ او د قزاقستان مرستې یې مهمې، اغېزمنې او پر وخت وبللې, چې دا مرستې د دواړو هېوادونو د دوستانه اړیکو ښکارندویي کوي.
ورته مهال, د افغانستان لپاره د قزاقستان سفیر د دواړو هېوادونو اړیکې دوستانه وبللې او د افغانستان له خلکو سره یې د مرستو پر دوام ټینګار وکړ. هغه څرګنده کړه چې دا مرستې د ماشومانو، مشرانو او ټولو اړمنو افغانانو لپاره دي.
په پای کې دواړو لوریو د دوه اړخیزه همکاریو پر دوام او د متقابلو اړیکو پر پیاوړتیا ټینګار وکړ.
نېټه: ۱۴۴۷/۰۴/۰۴ هـ ق
له پېښو سره د مبارزې آمادګۍ ملي اداره
