له پېښو سره د مبارزې آمادګۍ ملي ادارې ۵۹۶ قلمه داغمه توکي لیلام ته وړاندې کړل
له پېښو سره د مبارزې آمادګۍ ملي ادارې د زړو او له کاره لوېدلو شتمنیو او سرچینو د ښه مدیریت په موخه، د آزادې سیالۍ له لارې د شفافه او عامه لیلام پروسه ترسره کړه، چې له مخې یې ۵۹۶ قلمه بېلابېل ډوله داغمه توکي د پلور لپاره وړاندې کړل. دا لیلام د یادې ادارې په مرکز کې، د بېلابېلو برخو د ۵۰ تنه علاقمندانو او غوښتونکو په ګډون ترسره شو.
په دې بهیر کې د لیلام ټول پړاوونه په شفافه او عادلانه توګه او د اسلامي امارت د نافذو مالي اصولو او مقرراتو سره سم ترسره شول. د لیلام په پای کې، یو تن ګډونوال د ۷۶۴,۰۰۰ افغانیو په ارزښت، تر ټولو لوړ د وړاندیز قیمت په وړاندې کولو سره د لیلام رسمي ګټونکی اعلان شو.
له پېښو سره د مبارزې آمادګۍ ملي اداره، د دې ډول پروسو په ترسره کولو سره هڅه کوي، چې له یوې خوا له کاره د لوېدلو شتمنیو څخه د اغېزمنې ګټې اخېستنې زمینه برابره کړي، او له بلې خوا د شفافیت او حساب ورکونې اصول پلي کړي، ترڅو د خلکو باور پیاوړی شي او له ملي سرچینو څخه اغېزمنه ګټه واخیستل شي.
نېټه: ۱۴۴۶/۱۱/۰۴
له پېښو سره د مبارزې آمادګۍ ملي اداره
