له پېښو سره د مبارزې ملي ادارې ۵۸ رضاکاران د درې ورځني روزنیز ورکشاپ څخه فارغ شول
نن ورځ دوشنبه، له پېښو سره د مبارزې آمادګۍ ملي ادارې ۵۸ رضاکاران د لومړنیو روغتیایي مرستو او لټون او ژغورنې عملیاتو د درې ورځني ورکشاپ څخه، چې په کابل کې د ادارې په نوښت او د آغا خان پراختیایي شبکې (AKDN) په همکارۍ ترسره شو، فارغ شول.
د ورکشاپ په اختتامیه غونډه کې، د ادارې د اطلاعاتو او نشراتو رئیس، محترم حافظ محمد یوسف حماد د رضاکارۍ پر اهمیت خبرې وکړې او د آغا خان بنسټ له همکارۍ څخه یې مننه وکړه. د بهرنیو اړیکو آمر، محترم برهانالدین شینواری، د رضاکارانو ټیمونو د جوړولو پر اړتیا یې ټینګار وکړ، چې د ادارې د سرپرست، محترم ترابي صاحب، له لوري تل یاده شوې ده.
همداراز، د آغا خان بنسټ د بیړني حالت څانګې رئیس، محترم سید احمد سهیم، د دواړو ادارو د همکارۍ ستاینه وکړه او د روغتیایي وسایلو او حفظ الصحې کڅوړو د ورکړې ژمنه یې وکړه.
د ظرفیت لوړونې مسؤول، محترم نورآغا صاحبزاده، د رضاکارۍ شرعي اهمیت روښانه کړ او د رسول الله (ص) حدیث یې یاد کړ، چې خدای د هغو مرسته کوي، چې د نورو سره مرسته کوي. په همدی حال کې، یو رضاکار، حاجي امانالله، د ورکشاپ د بریالیتوب او د ادارې او آغا خان بنسټ د همکارۍ ستاینه وکړه او ورکشاپ یې د درې میاشتو روزنې په څېر ګټور وباله.
د دغې برنامي په پای کې ټولو رضاکارانو ته د فراغت سندونه ورکړل شول.
د دغه پروګرام موخه په سیمی کې د پیښو د معلوماتو رسولو، لومړنیو مرستو او ژغورنې عملیاتو ملاتړ دی، چې د کابل د ولسوالیو او ناحیو رضاکاران پکې شامل دي.
د یادونې وړ ده چي د ادارې د سرپرست په لارښوونه، رضاکارانو ته خوراکي توکي لکه اوړه، وریجې، غوړي او مالي مرسته هم ووېشل شوه.
نېټه: ۱۴۴۷/۲/۱۰ هـ ق
له پېښو سره د مبارزې آمادګۍ ملي اداره
