له پېښو سر د مبارزې آمادګۍ ملي ادارې او په افغانستان کې د سره صلیب نړیوالې کمېټې ترمنځ د ماینونو قرباني شویو د معلوماتو د ثبتولو ډیټابیس جوړولو لپاره د ګډو همکاریو تړون لیک لاسلیک شو

نن ورځ چهارشنبه له غرمې مخکې، له پېښو سره د مبارزې آمادګۍ ملي ادارې سرپرست الحاج ملا نورالدین ترابي، په افغانستان کې د سره صلیب نړیوالې کمېټې له رئیسې مېرمن کاتاریتا ریتز، د رئیسې سلاکار عزت ګل او د ناچاودو توکو برخې د همغږۍ مسؤول، فریډرک ماري فاوست سره د ماین پاکۍ د انسجام او همغږۍ رئیس، قاري نورالدین رستم خېل او د دې ادارې د نړیوالو اړیکو رئیس مولوي عبدالرحمن رحماني په شتون کې وکتل او د ګډو همکاریو تړون لیک یې ورسره لاسلیک کړ.
په دې ناسته کې، ښاغلي ترابي صاحب د سره صلیب پلاوي ته د ښه راغلاست ویلو ترڅنګ وویل، چې زه د سره صلیب له ټولو اصولو سره آشنا یم، او دې کمېټې له پخوا څخه تر نن پورې د افغانستان له خلکو سره پراخې مرستې کړې دي او موږ له دوی مننه کوو.
له پېښو سره د مبارزې آمادګۍ ملي ادارې سرپرست همداراز د سره صلیب له نړیوالې کمېټې د ماین پاکۍ په چارو کې د همکارۍ له امله مننه وکړه او ویې ویل، چې ماین پاکي د دې ادارې له اساسي دندو څخه ده، او موږ باید نږدې همکارۍ ولرو او د خلکو د خدمت لپاره د یو بل له امکاناتو ګټه واخلو. نوموړي همداراز له دوی وغوښتل چې د دې ادارې په تخنیکي کمېټه کې، چې له مؤسسو سره په ګډه جوړه شوې، ګډون وکړي، هغه ټینګار وکړ چې دا کمېټه باید نه یوازې د ماین پاکۍ، بلکې داخلي اصولو ته په کتو په نورو برخو کې هم د دې ادارې سره همکاري وکړي.
په همدې حال کې، په افغانستان کې د سره صلیب نړیوالې کمېټې رئیسې، مېرمن کاتاریتا ریتز، د ترابي صاحب له لوري د دې ملاقات د زمینې برابرولو له امله مننه وکړه او ویې ویل، چې زه د دې ادارې د ماین پاکۍ فعالیتونه له نږدې څارم او دې پایلې ته رسېدلې یم چې دا برخه په خپلو چارو کې ښې لاسته راوړنې لري.
د سره صلیب رئیسې وویل، زموږ د کار اساسي موخه د ماین قربانیانو ته رسېدنه ده، او د دوی شخصي معلومات باید داسې شریک او ثبت شي چې حقوقي مسؤولیت ونه لري. نوموړې زیاته کړه چې د دې کمېټې تخنیکي ټیم به له پېښو سره د مبارزې آمادګۍ ملي ادارې ته معرفي کړي، ترڅو معلومه شي چې موږ له دی ادارې سره په کومو برخو کې همکاري کولای شو.
د یادونې وړ ده، چې د دغه تړون لیک له مخې، د سره صلیب نړیواله کمېټه به د ماین پاکۍ د انسجام او همغږۍ ریاست سره نږدې او دوامداره اړیکې ولري، او د ماینونو او ناچاودو توکو د قربانیانو ټول شخصي معلومات به، د پیښې د وخت او ځای سره یو ځای، دې ریاست ته وسپاري او دغه ریاست به یاد معلومات د IMSMA معلوماتو مدیریت سیسټم کې په راتلونکې کې د کارولو لپاره ذخیره کوي.

نېټه:۱۴۴۶/۹/۱۹
له پېښو سره د مبارزې آمادګۍ ملي اداره