په ننګرهار ولایت کې د راستنېدونکو وضعیت ته د رسېدنې په موخه د همغږي غونډه ترسره شوه
ننګرهار- د تلې ۳مه-۱۴۰۲
د راستنېدونکو وضعیت ته د رسېدنې لپاره د الحاج مولوي عبدالرحمن راشد د کډوالو او راستنېدونکو چارو وزارت د مسلکي معین په مشرۍ، پېښو ته د رسېدو په چارو کې د دولت وزارت، د عامې روغتیا، د کلیو پراختیا وزارتونو او د افغانۍ سرې میاشت ټولنې یو لوړپوړي پلاوي په غړیتوب سره د راستنېدونکو وضعیت ته د رسېدنې په موخه د ننګرهار ولایت سیمه ییز مسوولینو سره د همغږي غونډه ترسره کړه.
په دې غونډه کې پرېکړه وشوه ترڅو په لاندینیو مواردو یو طرزالعمل جوړ شي:
د کډوالو او راستنېدونکو چارو وزارت دې له بهرنیو چارو وزارت سره له هیواد څخه بهر د کډوالو د ژوند په بهیر کې شته ستونزې حل کړي، په مومند دره ولسوالۍ کې حدودأ ۶۰۰ جریبه دولتي ځمکه چې پخوا د یاد کمېسیون لخوا کتل شوي وه، په لومړي ګام کې د ۵۰۰ کورنیو لپاره د هغوۍ اصلي ولایاتو ته د انتقال تر وخت د لنډمهالې سرپناه په توګه جوړه شي. د راستنېدو نه تر یوې میاشتې پورې په همدې ځاۍ کې د هغوۍ لپاره خوراکي توکي واخیستل شي، د ننګرهار ولایت په کچه دې د یاد ولایت والي تر څارنې لاندې د یادو پرېکړو پلي کولو کمېټه جوړه شي او د ولایت کمېټې کاري پرمختګ دې په دوامداره توګه ټاکل شوي کمېسیون ته وړاندې شي.
