په پنجشېر ولایت کې د قدرتي پېښو له خطر سره مخ ۱۰۶ سیمې سروې او تثبیت شوې
د پنجشېر ولایت له پېښو سره د مبارزې آمادګۍ ریاست، د یاد ولایت د مرکز بازارک او رُخه ولسوالۍ په اړوندو سیمو کې د طبیعي پېښو له خطرونو سره مخ د ۱۰۶ سیمو د سروې، تشخیص او تثبیت بهیر بشپړ کړ.
دغه سروې د اړوندو ادارو د استازو د ګډ تخنیکي ټیم لخوا ترسره شوې، چې د پایلو له مخې یادې سیمې د سېلابونو، ځمکې ښویېدنې، د ډبرو غورځېدو، واورو ښویېدو او د پنجشېر سیند د اوبو لوړېدو له خطرونو سره مخ دي.
مسؤلین وایي، د دغو ارزونو پایلې به د خطرونو د کمولو او د انساني تلفاتو او مالي زیانونو د مخنیوي په موخه د وقایوي تدابیرو د پلان جوړونې او پلي کېدو لپاره زمینه برابره کړي. همدارنګه، دغه بهیر به د پنجشېر ولایت له پېښو سره د مبارزې آمادګۍ ریاست د کاري پلان له مخې د ولایت په نورو زیانمنونکو سیمو کې هم دوام ومومي.
نېټه: ۱۴۴۷/۱۲/۳۰ هـ ق
له پېښو سره د مبارزې آمادګۍ اداره
