په کونړ ولایت کې ۵۰ زلزلهځپلو کورنیو ته ۵ قلمه غیرخوراکي توکي ووېشل شول
له پېښو سره د مبارزې آمادګۍ ملي ادارې د خپلو یو له کاري شریکانو څخه, د هستوګنې لپاره د آغا خان بنسټ په ملاتړ، د کونړ ولایت په ډیوهګل دره کې د شهیدانو، ټپیانو او زیانمنو ۵۰ کورنیو ته، ۵ قلمه غیرخوراکي توکي ووېشل.
د مرستو د وېش په دې پروګرام کې د کونړ ولایت له پېښو سره د مبارزې آمادګۍ رئیس, مولوي محمد مبین عمر مفتون وویل، چې نن د هستوګنې لپاره د آغا خان بنسټ سره په همغږۍ د شهیدانو، ټپیانو او زیانمنو ۵۰ کورنیو ته غیرخوراکي مرستې ووېشل شوې.
په همدې مهال، د یاد بنسټ د اړیکو آمر شکرالله مدني وویل، چې په دې مرستو کې ۵۰ پایې خیمې، ۸۸ تختې ترپالونه، ۵۰ د پخلنځي بستې او ۵۰ د روغتیايي وسایلو بستې شاملې دي.
همدارنګه، د دغو مرستو ترلاسه کوونکو د خوښۍ او مننې تر څنګ وویل چې زیانمن خلک لا هم نورو مرستو ته اړتیا لري.
نېټه: ۱۴۴۷/۰۳/۱۲ هـ ق
له پېښو سره د مبارزې آمادګۍ ملي اداره
