پېښو ته د رسېدو په چارو کې د دولت وزارت مرستیال او زلزلې ځپلو ته د رسېدنې او مرستو د تنظیم کمېسیون سرپرست د برمل قومي مشرانو سره وکتل
کابل- د وږي ۲۳مه-۱۴۰۱
محترم مولوي شرف الدین مسلم، پېښو ته د رسېدو په چارو کې د دولت وزارت مرستیال او زلزلې ځپلو ته د رسېدنې او مرستو د تنظیم کمېسیون سرپرست نن سهار د پکتیکا ولایت برمل ولسوالۍ د وروستیو سیلاب ځپلو او مشرانو سره ولیدل او د هغوۍ ستونزې یې واورېدې.
په دې لیدنه کې د برمل خلکو د وروستۍ زلزلې له امله رامنځته شويو ستونزو په یادونې سره د هغوۍ د حل غوښتنه وکړه.
ورته مهال هغوۍ د مخابراتي شبکو، د روغتیایي کلینیکونو او د تګ او راتګ لویو لارو نشتون د نورو ستونزو په توګه یادې کړې.
ورپسې پېښو ته د رسېدو په چارو کې د دولت وزارت مرستیال ووېل چې د دغو خلکو ستونزو ته به رسېدنه وشي.
ښاغلي مسلم زیاته کړه چې د دې ترڅنګ چې د ولایت مقام سره به خبرې وکړي د پېښو سره مبارزې ریاست ته یې لارښوونه وکړه ترڅو د مرستندویه موسسو سره دي خبرې وکړي او د یاد ریاست له امکاناتو څخه په ګټې اخیستنې سره دي هم د برمل د خلکو سره لازمې مرستې وکړي.
