د اسپین بولدک په پوله کې له موسسو سره د همږي غونډه ترسره شوه
اسپین بولدک- د تلې ۱۶مه-۱۴۰۲
په اجباري توګه ایستل شویو راستنېدونکو حالت ته د رسېدنې لوړپوړی پلاوي اسپین بولدک ته د خپل سفر په ترڅ کې له همکارو موسسو سره د اسپین بولدک په پوله کې اجباري ایستل شویو کډوالو ته د رسېدنې لړۍ ګړندۍ کولو په اړه لیدنه وکړه.
په دې غونډه کې لومړۍ د اسپین بولدک په پوله کې د کډوالو مسوول د اجباري ایستل شویو کډوالو شمېرو ته په اشارې سره ووېل، کډوال لنډمهاله کمپونو، خوراکي او غیرخوراکي توکو، روغتیایي خدمتونو او د اوبو رسولو سیسټم ته ډېره اړتیا لري.
ورپسې په اجباري توګه ایستل شویو د راستنېدونکو عمومي حالت ته د رسېدنې په موخه لوړ پوړي پلاوي د الحاج مولوي عبدالرحمن راشد د کډوالو او راستنېدونکو چارو وزارت مسلکي معین په مشرۍ، د مولوي عبدالباري فضلي د کرنې، اوبو لګولو او مالدارۍ وزارت معین، مولوي سید احمد مستقیم د کلیو پراختیا وزارت معین، مولوي احمد شاه ذهین پېښو ته د رسېدو په چارو کې د دولت وزارت د تدارکاتو آمر او د مولوي محمد صالح آخندزاده د افغای سرې میاشتې ټولنې استازي په شتون کې د اجباري ایستل شویو کډوالو عمومي حالت ته پر رسېدنې ټینګار وکړ.
یاد پلاوي د کډوالۍ پر پراخو اړخونو او د اسپین بولدک په پوله کې له پاکستان هېواد څخه اجباري ایستل شویو کډوالو پر ستونزو خبرې وکړې او د کډوالو لپاره یې د خوراکي، غیرخوراکي او نغدي مرستو پر همغږي کولو د ټینګار غوښتنه وکړه.
اجباري ایستل شویو د کډوالو حالت ته د رسېدنې پلاوي د کډوالو لپاره د افغانستان اسلامي امارت پر امکاناتو او کړنو خبرې وکړې او د مرستو رسولو د لړۍ ګړندۍ کولو او کډوالو ته د رسېدنې په موخه د شیفټ ټیمونو جوړولو غوښتنه وکړه.
وروسته د IOM, WFP او UNCHAR دفترونو استازو د خپلو کړنو په اړه معلومات وړاندې کړل او د ټولو کډوالو لپاره یې د رسېدنې لړۍ ګړندۍ کولو په اړه ژمنه وکړه.
په پای کې دواړو خواوو د مرستو یوځاۍ کولو لپاره د لا زیاتې همغږي او ټولو کډوالو ته په یو ډول د مرستو پر رسولو ټینګار وکړ.
