په ارزګان ولایت کې د یوې ویالې د استنادي دیوال د جوړوېدو کار پرانستل شو
د عالیقدر امیرالمؤمنین (حفظهالله) د فرمان له مخې، چې هر ولایت ته د بیړنیو وقایوي پروژو د پلي کېدو لپاره یې ۱,۰۰۰,۰۰۰ (یو میلیون) افغانۍ ځانګړې کړې دي، او دا وقایوي يروژې به له پېښو سره د مبارزې آمادګۍ ملي ادارې لخوا پلي کېږي. د دې لړۍ په دوام د ارزګان ولایت له پېښو سره د مبارزې آمادګۍ ریاست د یاد ولایت په مرکز د ګرم اب په سیمه کې د یوې ویالې د حفاظت لپاره د استنادي دیوال جوړولو د پروژې کار د ۱,۰۹۳,۰۰۰ (یو میلیون او ۹۳ زره) افغانیو په لګښت پیل کړ.
د دې ویالې دیوال چې مخکې د رود لخوا د اوبو پرې راتلو سره نړېدلی وو او په دې سیمه کې سلګونه کورونه او کرنیزې ځمکې شتون لري چې د ویالې دیوال په نړېدو سره دغو کورونو او کرنیزو ځمکو ته به اوبه نه رسېدلې، چې اوس مهال د ارزګان لایت له پېښو سره د مبارزې آمادګۍ رییس محترم ملا حضرت الله امدادالله په شتون کې کورونو او کرنیزو ځمکو ته د اوبو د رسولو په موخه د ویالې لپاره د استنادي دیوال جوړولو کار پیل شو.
له پېښو سره د مبارزې آمادګۍ رییس په ښه کیفیت او پر وخت د دې پروژې کارونو د بشپړېدو په اړه ډاډ څرګند کړ او ویې وېل چې دا پروژه به د هستوګنیزو کورونو او کرنیزو ځمکو لپاره خورا ګټوره تمامه شي.
ورته مهال، د سیمې اوسېدونکو له پېښو سره د مبارزې آمادګۍ ملي ادارې له دې اقدام څخه مننه او قدرداني وکړه.
نېټه:۱۴۴۶/۱۰/۱۲
له پېښو سره د مبارزې آمادګۍ ملي اداره
