په میدان وردګ ولایت کې د هاوان مرمۍ او ماینونه خنثی شول
د میدان وردګ ولایت له پېښو سره د مبارزې آمادګۍ ریاست، د یاد ولایت مرکز میدان ښار په چهار قلعه سیمه کې د هاوان مرمۍ او ماینونه کشف کړل او د تخنیکي ټیمونو په واسطه یې په خوندي توګه خنثی کړل.
دا مرمۍ او ماینونه له پېښو سره د مبارزې آمادګۍ ریاست لخوا د آریا ماین پاکۍ موسسې په همکارۍ وموندل شول، او د یادې مؤسسې د تخنیکي ټیم له لوري په بریالیتوب او خوندي توګه لمنځه یوړل شول.
د یاد ولایت له پېښو سره د مبارزې آمادګۍ رییس محترم مولوي فیض الله جلالي، د آریا مؤسسې له همکاریو قدرداني وکړه او زیاته یې کړه، چې د جګړې له پاته چاودېدونکو توکو څخه د سیمو د پاکولو هڅې به دوام ولري او د ولایت په کچه د ماین پاکۍ ګرځنده ټیمونه ټاکل شوي څو ماینونه کشف او لمنځه یوسي او د احتمالي خطرونو څخه مخنیوی وشي.
نېټه:۱۴۴۶/۱۰/۲۳ هــ ق
له پېښو سره د مبارزې آمادګۍ ملي اداره
