له پېښو سره د مبارزې آمادګۍ ملي ادارې او د افغان ځوانانو خدماتي AYSO مؤسسې ترمنځ د دوه سوه او دیارلس زره او نه سوه او اته دیرش (٢١٣,٩٣٨) ډالرو په ارزښت د ګډو همکاریو تفاهم نامه لاسلیک شوه
نن ورځ د چهار شنبې په سهار، له پېښو سره د مبارزې آمادګۍ ملي ادارې د کارکوونکو چارو رئیس محترم الحاج مولوي محمد عابد نعماني د افغان ځوانانو خدماتي AYSO مؤسسې د اجرایوي رییس، محترم انجنیر عبدالحبیب تحریک سره په خپل کاري دفتر کې وکتل او د ګډو همکاریو تفاهم نامه یې ورسره لاسلیک کړه.
په پیل کې، نعماني صاحب راغلي پلاوي ته ښه راغلاست وویل او له اړمنو او زیانمنو شویو وګړو سره یې د مرستو کوونکو ستاینه وکړه او یادې پروژې یې د خیر کار یادې کړې همدارنګه يې وویل، چې په ولایتي ریاستونو کې به اړوند مسؤلین له دوی سره د پروژې په پلي کولو کې پوره همکاري کوي.
ورپسې، محترم تحریک د خپلې پروژې په اړه بشپړ معلومات وړاندې کړل او زیاته یې کړه، چې ولایتي کارکوونکو له دوی سره په هر ډول حالتونو کې مرسته کړې ده.
په پای کې، د دواړو لوریو ترمنځ ټولټال د دوه سوه او دیارلس زره او نه سوه او اته دیرش (٢١٣,٩٣٨) ډالرو په ارزښت د ګډو همکاریو تفاهم نامه لاسلیک شوه، چې له مخې به یې د پکتیکا ولایت په دیله او جاني خېل ولسوالیو او د خوست ولایت په مرکز او صبري ولسوالۍ کې د سیمه ییزو اوسېدونکو په غوښتنه څلور بنسټیزې پروژې د اوبولګولو د کانالونو، سربندونو، د سېلابونو د مخنیوي دیوالونو، پلچکونو او سړکونو برخو کې پلې شي.
نېټه: ۱۴۴۷/٧/۳ هـ ق
له پېښو سره د مبارزې آمادګۍ ملي اداره
