د بغلان ولایت له پېښو سره د مبارزې آمادګۍ ریاست په پلخمري ولسوالۍ کې د سیلابي لارې د پاکولو کار بشپړ کړ
له پېښو سره د مبارزې آمادګۍ ادارې او د هستوګنې لپاره د آغاخان موسسې (AKAH) ترمنځ د لاسلیک شوي هوکړه لیک له مخې، د بغلان ولایت له پېښو سره د مبارزې آمادګۍ ریاست، د یاد ولایت د پلخمري ولسوالۍ په کوچنۍ آهن درې کلي کې د سیلابي لارې پاکولو د پروژې کار بشپړ کړ.
دا سېلابي لاره له پېښو سره د مبارزې آمادګۍ ادارې له بودجې څخه د اته لکه او نولس زره او شپږ سوه او شپېته (۸۱۹٫۶۶۰) افغانیو په لګښت د ۹۷۰ مترو په اوږدوالي، له ۴ څخه تر ۸.۵ مترو په پلنوالي او له ۰.۳ سانتيمترو څخه تر ۲.۵ متره په ژوروالي پاکه شوه.
د پروژې په بشپړېدو سره، د بغلان ولایت له پېښو سره د مبارزې آمادګۍ ریاست مسؤلینو له پروژې څارنه وکړه او د پروژې کیفیت یې د ډاډ وړ وباله. د یادې پروژې په بشپړېدو سره شاوخوا ۵۰۰ کورونه چې د سیلاب له جدي ګواښ سره مخ وو، د احتمالي زیانونو له خطر څخه خوندي شول.
د سیمې اوسېدونکو د دې پروژې له بشپړېدو خوښي څرګنده کړه او دا یې د سیلابونو پر وړاندې د خلکو کورونو او کرنیزو ځمکو د ساتنې لپاره یو مهم او اغېزناک ګام وباله.
