د پروان ولایت له پېښو سره د مبارزې آمادګۍ ریاست په بېلابېلو ولسوالیو کې د سیلاب له امله تړل شوي سړکونه پرانیستل او د مانده، ویالو او سېلابي لارو د پاکولو چارې دوام لري
له پېښو سره د مبارزې آمادګۍ ادارې د لوی رئیس، محترم الحاج ملا نورالدین ترابي په لارښوونه، د پروان ولایت له پېښو سره د مبارزې آمادګۍ ریاست د طبیعي پېښو د خطرونو د کمولو، د عامه زیربناوو د ساتنې او د خلکو د تګ راتګ د اسانتیا په موخه، د تېرو دوو میاشتو راهیسې د یاد ولایت د سالنګ، شینواري، سُرخ پارسا او شیخ علي ولسوالیو په بېلابېلو سیمو کې د ماندو، ویالو او سیلابي لارو د پاکولو چارې ترسره کړي دي.
د دغو چارو په ترڅ کې د شیخ علي ولسوالۍ د دروازې او دهن رباط کلیو هغه سړکونه چې د وروستیو سیلابونو له امله په خټو، ډبرو او رسوباتو پوښل شوي وو، د درنې ماشینرۍ په وسیله پاک او بېرته د تګ راتګ لپاره پرانیستل شول.
همدارنګه د یادې ولسوالۍ د ځنګله کلي په سیمه کې، چې عمومي سړک او ښوونځی یې د سیلابونو له جدي ګواښ سره مخ وو، د ساتنې لپاره یې د شګو او جغل یو محافظتي دېوال جوړ شو، څو د سیلابونو د احتمالي زیانونو مخنیوی او د عامه تأسیساتو لپاره خوندیتوب رامنځته شي.
نېټه: 1448/01/01 هـ ق
له پېښو سره د مبارزې آمادګۍ اداره
