د پروان ولایت له پېښو سره د مبارزې آمادګۍ ریاست ۱۱۴ زیانمنو کورنیو ته غیرخوراکي توکي او نغدي پیسې ووېشلې

له پېښو سره د مبارزې آمادګۍ ادارې د مشرتابه له لوري د IOM، WFP، UNICEF او سولیډیریټي مؤسسې سره د همغږۍ پر بنسټ، د پروان ولایت له پېښو سره د مبارزې آمادګۍ ریاست د یادو دفترونو په مالي او تخنیکي ملاتړ، هغو ۱۱۴ کورنیو ته چې د وروستیو ورښتونو او سېلابونو له امله زیانمنې شوې وې، له سروې وروسته نغدي او غیرخوراکي مرستې ووېشلې.

په دې لړۍ کې، د مسؤلینو په شتون کې د خوړو نړیوال پروګرام  له خوا هرې کورنۍ ته ۱۱,۶۰۰ افغانۍ نغدي پیسې، د کډوالۍ نړیوال سازمان له لوري هرې کورنۍ ته د پخلنځي یوه بسته، ۳ تختې کمپلې، یوه پلاستیکي فرش، ۴ سولري څراغونه او هغو ۱۴ کورنیو ته چې کورونه یې بشپړ ویجاړ شوي وو، هرې کورنۍ ته یوه خیمه هم ووېشل شوه.

همدارنګه د یونیسف مؤسسې له لوري هرې کورنۍ ته یوه روغتیایي بسته او د سولیډریټي مؤسسې له خوا هرې کورنۍ ته له ۵۴۰۰ څخه تر ۷۶۰۰ افغانۍ ووېشل شوې.

نېټه: ۱۴۴۷/۱۲/۰۸ هـ ق

له پېښو سره د مبارزې آمادګۍ اداره