د ننګرهار ولایت په کوټ ولسوالۍ کې د سېلابي لارې د پاکولو او د استنادي دیوال د جوړولو کار بشپړ او ګټې اخیستنې ته وسپارل شول
له پېښو سره د مبارزې آمادګۍ ملي ادارې د محترم مقام په لارښوونه، د ننګرهار ولایت له پېښو سره د مبارزې آمادګۍ ریاست د دې ولایت د کوټ ولسوالۍ د لاغرجوی په کلي کې د سېلابي لارې د پاکولو او د یو استنادي دیوال د جوړولو او ترمیم چارې بشپړې کړې او ګټې اخیستنې ته یې وسپارل.
په دې پروژه کې له تخنیکي نقشې او ټاکل شویو مشخصاتو سره سم د ۵۱ متره په اوږدوالي د استنادي دېوال جوړولو او همدارنګه د ۲۹ متره په اوږدوالي د استنادي دېوال د ترمیم او د سیلابي لارې د پاکولو چارې ټولټال د ۱,۰۲۳,۲۵۰ افغانیو په لګښت له پېښو سره د مبارزې آمادګۍ ملي ادارې له بودجې څخه تمویل او په بریالیتوب سره بشپړې شوې.
د دې پروژې په پلي کېدو سره ۱۲۰۰ کورونه، ۱۵۰۰ جریبه کرنیزه ځمکه، ۴ کیلومتره سړک، ۱ سربند، ۸ جوماتونه، ۸۰ دوکانونه او یو کلینیک د سېلاب له خطرونو څخه خوندي شول.
نېټه:۱۴۴۷/۹/۲۵ هـ ق
له پېښو سره د مبارزې آمادګۍ ملي اداره
