د کابل ښار په څوارلسمه ناحیه کې غیر معیاري د تېلو ټانکونه او پمپ سټېشنونه وتړل شول

نن ورځ د سې شنبې سهار، د افغانستان اسلامي امارت د ریاست‌الوزرا عالي مقام د اقتصادي مرستیال د محترم مقام په لارښوونه، د کابل ښار په څوارلسمه ناحیه کې د تېلو هغه ټانکونه او پمپ سټېشنونه چې د اور لګېدنې پر وړاندې یې د احتیاطي تدابیرو معیارونه نه وو رعایت کړي، د اور لګېدنې د مخنیوي دایمي کمېټې لخوا یې د تړل کېدو بهیر پیل شو.
د تېلو ټانکونو او پمپ سټېشنونو د تړلو په لړ کې، له پېښو سره د مبارزې آمادګۍ ملي ادارې د اور لګېدنې کارپوه، قاري اجمل عمري وویل، هغه د تېلو ټانکونه او پمپ سټېشنونه چې د احتیاطي تدابیرو د عملي کولو لپاره مخکې طرزالعمل او چک‌لېست ورسره شریک شوي وو، د هغو احتیاطي تدابیرو په نه رعایتولو سره نن ورځ وتړل شول. نوموړي له ټولو مالکینو څخه وغوښتل، څو مخکې ورکړل شوي تدابیر عملي کړي، تر څو ځان، مال او شتمنۍ یې خوندي پاتې شي.
ښاغلي عمري زیاته کړه، نږدې یو نیم کال مخکې، د ریاست‌الوزرا د اقتصادي مرستیال د محترم مقام په لارښوونه، د اور لګېدنې د مخنیوي لپاره دغه کمېټه جوړه شوې وه، چې تر اوسه یې شاوخوا ۱۵۰ د تېلو ټانکونه او پمپ سټېشنونه په کنټرولي توګه سروې کړي دي. د دغې سروې راپورونه د اقتصادي مرستیال محترم مقام ته وړاندې شوي، چې له جملې یې د ۵۵ د تېلو ټانکونو او پمپ سټېشنونو راپور تایید شوی، او د هماغه راپور له مخې، غیر معیاري تأسیسات تړل کېږي.
نوموړي وویل، چې د دې کمېټې د جوړېدو موخه د اور لګېدنې پر وړاندې د احتیاطي تدابیرو نیول دي، تر څو په ټول هېواد کې د خلکو ژوند، مال او ملي شتمنۍ وساتل شي.
د یادونې وړ ده، چې د اور لګېدنې د مخنیوي دایمي کمېټې تر اوسه ۳۷۰ د تېلو ټانکونو او پمپ سټېشنونو ته چک‌لېستونه وېشلي دي، چې له یادې جملې یې ۵۵ د تېلو ټانکونه ارزول شوي. په دې ارزونه کې، ۱ د تېلو ټانک معیاري، ۳۱ د تېلو ټانکونه نسبتاً معیاري، ۶ د تېلو ټانکونه نیمه معیاري او ۱۷ د تېلو ټانکونه غیر معیاري پېژندل شوي دي او د تېلو د ټانکونو د څېړنې بهیر لا هم دوام لري.

نېټه: ۱۴۴۶/۱۱/۱ هــ ق
له پېښو سره د مبارزې آمادګۍ ملي اداره