له پېښو سره د مبارزې آمادګۍ ملي ادارې او د افغانستان د پرمختیایي پروګرامونو موسسې (ODPA) ترمنځ د ګډو همکاریو تفاهمنامه لاسلیک شوه
نن ماسپښین، سهشنبه، له پېښو سره د مبارزې آمادګۍ ملي ادارې سرپرست الحاج ملا نورالدین ترابي، د افغانستان د پرمختیایي پروګرامونو موسسې د اړیکو مسوول، قدرت الله امیني سره په خپل کاري دفتر کې وکتل او د دې ادارې سره د یادې موسسې د تفاهمنامې جزییات یې واورېدل.
په دې لیدنه کې، ترابي صاحب د ښه راغلاست ترڅنګ وویل چې هغه موسسې چې د خلکو د مرستو په برخه کې هڅې کوي د قدر وړ دي او له ټولو ملي او نړیوالو ادارو او سازمانونو څخه یې وغوښتل چې د طبیعي او غیر طبیعي پېښو په وړاندې د مبارزې په برخه کې له دې ادارې سره بشپړه همکاري وکړي.
په همدې حال کې، د افغانستان د پرمختیایي پروګرامونو موسسې د اړیکو مسوول قدرت الله امیني، د تفاهمنامې په اړه معلومات وړاندې کړل او ویې ویل چې دا پروژه به د هرات ولایت په رباط سنګي ولسوالۍ کې پلي شي، او له مخې به یې خلکو ته نغدي مرستې ووېشل شي.
د یادونې وړ ده چې له پېښو سره د مبارزې آمادګۍ ملي ادارې د سرپرست او د یادې موسسې د رئیس احمد خالد حنیف ترمنځ د لاسلیک شوې تفاهمنامې له مخې، د ټولټال ۳۳,۰۰۰ یورو په ارزښت به د هرات ولایت په رباط سنګي ولسوالۍ کې د طبیعي پېښو له امله ۱۳۲ زیانمنو کورنیو ته نغدي مرستې ووېشل شي. په دې ډول چې هرې کورنۍ ته به ۱۵۵ یورو یا د هغه معادل په افغانیو کې د خوراکي او غیر خوراکي توکو د برابرولو لپاره ووېشل شي.
نېټه:۱۴۴۶/۷/۶
له پېښو سره د مبارزې آمادګۍ ملي اداره
