له پېښو سره د مبارزې آمادګۍ ملي ادارې او د افغانستان لپاره د ښو ګاونډیانو نړیوالې موسسې  ترمنځ د ګډو همکاریو تفاهم نامه لاسلیک شوه

نن ورځ چهارشنبه له غرمې وروسته، له پېښو سره د مبارزې آمادګۍ ملي ادارې سرپرست، الحاج ملا نورالدین ترابي، د افغانستان لپاره د ښو ګاونډیانو نړیوالې موسسې له عمومي مسؤل، عبدالستار سا ﺉد سره وکتل او له هغه سره یې د ګډو همکاریو تفاهم نامه لاسلیک کړه.
په دې کتنه کې، ترابي صاحب د يادې موسسې پلاوي ته ښه راغلاست ووايه او ويې ويل، چې د موسسو لپاره د افغانستان د خلکو په ګټه د هر ډول اغېزمن فعاليت زمينه برابره ده او موږ همدارنګه هڅه کوو، چې هغوى ته لا زياتې آسانتياوې برابرې کړو، ترڅو له دې لارې څخه د افغانستان وګړي له مرستو څخه زيات مستفد شي.
په همدې حال کې، د افغانستان لپاره د ښو ګاونډیانو نړیوالې موسسې عمومي مسؤل، عبدالستار ساﺉد د دې ادارې له سرپرست څخه د همکاریو په پار مننه وکړه او ویې ویل، چې موږ هڅه کوو چې دا پروژه په ښه کیفیت او سرعت سره تطبیق کړو.
د یادولو وړ ده، چې په  وروستیو کې د دواړو ادارو ترمنځ د ۹۰,٠٠٠ ډالرو په ارزښت د ګډو همکاریو تفاهم نامه لاسلیک شوه، چې پر اساس به یې د دې موسسې په واسطه د کاپيسا ولایت د نجراب ولسوالۍ په جورغل کلي کې د سېلابونو د خطرونو د کمولو په موخه د ۱۰۰ مترو په اوږدوالي یو استنادي دیوال جوړ شي. همدارنګه په دې پروژه کې د څښاک د اوبو د سرچینو بیا رغونه، د اقلیم د بدلونونو او حفظ الصحې په اړه د عامه پوهاوي پروګرام ترسره کول، ۱۲۰ کورنیو ته د حفظ الصحې کېټونو وېشل او اړمنو کورنیو ته د ماشومانو د جامو ۱۰۰۰ بستې هم په دې پروژه کې شاملې دي.

نېټه: ١٤٤٦/١١/١٦ ه. ق
له پېښو سره د مبارزې آمادګۍ ملي اداره