له پېښو سره د مبارزې آمادګۍ ملي ادارې لوی رئیس له لوري ۱۵۲ بې‌ځایه شویو کورنیو ته نغدي او غیرخوراکي مرستې ووېشل شوې

نن ورځ د دوشنبې په سهار، له پېښو سره د مبارزې آمادګۍ ملي ادارې لوی رئیس، محترم الحاج ملا نورالدین ترابي، چې د ختیځو ولایتونو د بې‌ځایه شویو د وضعیت د مدیریت په موخه یې د یو مسلکي پلاوي په مشرۍ ننګرهار ولایت ته سفر کړی، هغو ۱۵۲ کورنیو ته چې د وروستیو جګړو له امله د کونړ ولایت او د دغه ولایت له جګړه‌ځپلو ولسوالیو څخه بې‌ځایه شوې دي، له سروې وروسته د همکارو بنسټونو له لوري برابرې شوې نغدي او غیرخوراکي مرستې ووېشلې. 

د مرستو د وېش پر مهال، محترم ترابي صاحب وویل چې دا اداره د کډوالۍ نړیوال سازمان (IOM) سره ښې کاري اړیکې لري او دغه سازمان په بېلابېلو برخو کې ورسره همکاري کړې ده. نوموړي زیاته کړه چې نن هم د IOM دفتر او د PUAMI  مؤسسې له لارې ۱۵۲ بې‌ځایه شویو کورنیو ته نغدي او غیرخوراکي مرستې وېشل کېږي.

 
ورپسې، د IOM دفتر د ختیځ زون مسؤل، سرفراز څرګند، له پېښو سره د مبارزې آمادګۍ ملي ادارې له همکاریو مننه وکړه او د مرستو د وېش پروګرام په اړه یې معلومات وړاندې کړل، او همدارنګه یې په ورته حالاتو کې د لا زیاتو همکاریو ژمنه وکړه.

د یادونې وړ ده چې  په دی توزیع کی د IOM   له لارې ۲۲ کورنیو هرې یوې ته ۸۵۰۰ افغانۍ او ۱۳۰ کورنیو هرې یوې ته ۳ تختې کمپلې، د پخلنځي یوه بسته (چې ۲۹ قلمه توکي پکې شامل دي)، یو عدد سولري څراغ ،  یوه تخته فرش او یو عدد جارو   ورکړل شول. همدارنګه، د PUAMI مؤسسې له لوري ۱۵۲ کورنیو هرې یوې ته یوه روغتیایي بسته ووېشل شوه.

په پای کې، د مرستو ترلاسه کوونکو له پېښو سره د مبارزې آمادګۍ ملي ادارې، د IOM دفتر او د PUAMI مؤسسې څخه مننه وکړه او د ورته مرستو د دوام غوښتنه یې وکړه.

نېټه:۱۴۴۷/۱۰/۱۲ هـ ق

له پېښو سره د مبارزې آمادګۍ ملي اداره