په میدان وردګ ولایت کې د یو ګبیوني دیوال د جوړولو چارې پیل شوې
د میدان وردګ ولایت له پېښو سره د مبارزې آمادګۍ ریاست د یاد ولایت په سیدآباد ولسوالۍ کې د یو ګبیوني دیوال د جوړولو چارې د ۵۳ متره اوږدوالي په درلودلو سره پیل کړې.
دغه دیوال به د سیدآباد ولسوالۍ په ګیدړخیل سیمه کې د ۵۳ متره اوږدوالي او ۳ متره لوړوالي په درلودلو سره جوړ شي.
د میدان وردګ ولایت له پېښو سره د مبارزې آمادګۍ محترم رئیس، احمد شاه ذهین د یاد ولایت اوسېدونکو ته د ډاډ ورکونې ترڅنګ وویل، چې د ګبیوني دیوالونو جوړول به په هغو سیمو کې عملي کېږي، چې کورنۍ، کرنیزې ځمکې او د هغوی حاصلات د سېلابونو د راتلو له امله له جدي ګواښ سره مخ وي.
د یادونې وړ ده، چې د دې پروژو د پلي کولو موخه د سېلابونو له خطرونو څخه د ښاریانو د ځان او مال ساتنه ده.
نېټه: ۱۴۴۷/۱۱/۰۹ هـ ق
له پېښو سره د مبارزې آمادګۍ اداره
