د افغانستان د ماینپاکۍ پروګرام (MAPA) د شریکانو د لوړې کچې ناسته ترسره شوه
د افغانستان د ماینپاکۍ پروګرام (MAPA) د شریکانو د لوړې کچې د همغږۍ ناسته د همکاریو د پیاوړتیا، د نویو معلوماتو د تبادلې، د ستونزو د ارزونې او د مستندو پرېکړو د ملاتړ په موخه د اړونده شریکانو ترمنځ ترسره شوه.
دا ناسته له پېښو سره د مبارزې آمادګۍ ملي ادارې د ماینپاکۍ د انسجام او همغږۍ ریاست (DMAC) په نوښت او د ماینپاکۍ تخنیکي برخې (MATC) په تخنیکي ملاتړ جوړه شوه چې د تطبیق کوونکو ادارو او نورو شریکانو استازو په کې ګډون وکړ.
په غونډه کې د تېرې ناستې پر پرېکړو بیاکتنه، د پوهنې وزارت په ښوونځیو کې د ماین د خطرونو د پوهاوي (EORE) د ادغام په اړه د تازه معلوماتو وړاندې کول، د MATC له لوري د FCDO پروژې جزئیات وړاندې کول، د ملګرو ملتونو په پروژو کې د ماینپاکۍ ادغام، د MAPA د سرچینو بسیج، د تطبیق کوونکو شریکانو راپورونه او د عملیاتو لنډیز د بحث اصلي موضوعات وو.
همدارنګه د شریکانو د نظرونو او وړاندیزونو ترلاسه کولو په موخه د پوښتنو او ځوابونو لپاره هم یوه برخه ځانګړې شوې وه. د غونډې په پای کې داکتر ایمل د ټولو بحثونو لنډیز وړاندې کړ او خپله اختتامي وینا یې وړاندې کړه.
یاده ناسته به د شریکانو تر منځ د لا ډېرې همغږۍ، له ماینونو څخه د خوندي افغانستان د جوړولو په برخه کې د ظرفیتونو د یوځای کېدو او د ګډو هڅو د پیاوړتیا لپاره یو ښه فرصت برابر کړي.
نېټه: ۱۴۴۷/۳/۱۱ هـ ق
له پېښو سره د مبارزې آمادګۍ ملي اداره
