د بادغیس ولایت په مقر ولسوالۍ کې د ګبیوني دېوال د ترمیم پروژې کار پیل شو
د عالیقدر امیرالمؤمنین حفظهالله د لارښوونې له مخې، د طبیعي پېښو د خطرونو د کمولو په موخه، د هېواد په هر ولایت کې د وقایوي پروژو د پلي کېدو لپاره یو میلیون افغانۍ ځانګړې شوې دي. په همدې لړ کې، له پېښو سره د مبارزې آمادګۍ ملي اداره، له سروې وروسته او د بیړني حالت د تثبیت وروسته، یادې پروژې د هېواد په کچه پلي کوي.
د ګبیوني دېوال د ترمیم دغه پروژه د بادغیس ولایت د مقر ولسوالۍ په دهن توتک سیمه کې، ټولټال د ۷۸۴,۲۰۰ افغانیو په لګښت، له پېښو سره د مبارزې آمادګۍ ملي ادارې له لوري، د رسمي مراسمو په ترڅ کې د سیمه ییزو چارواکو په شتون سره پرانیستل شوه.
په یادو مراسمو کې د بادغیس محترم والي، له پېښو سره د مبارزې آمادګۍ رئیس، د اقتصاد رئیس او د ټولګټو رئیس ګډون کړی او پروژه د محترم والي صاحب له لوري د بنسټ ډبرې په ایښودو سره، په رسمي ډول پیل شوه.
د دې پروژې د پلي کېدو موخه دا ده چې له هستوګنېزو سیمو، کرنیزو ځمکو او په ځانګړي ډول د هغه عمومي سړک څخه ساتنه وشي چې بېلابېلې ولسوالۍ د ولایت له مرکز سره نښلوي. دا ګبیوني دېوال به د سېلابونو، د خاورې له ښوېدو او د نورو طبیعي له خطرونو څخه په مخنیوي کې اغېزناک رول ولوبوي او د سیمې د ترانسپورتي اړیکو د پرې کېدو مخه به ونیسي.
سیمه ییزو چارواکو د دې پروژې د پرانیستې په مراسمو کې د طبیعي پېښو د خطرونو د کمښت، د تګ راتګ د آسانتیا، د بنسټیزو جوړښتونو د پیاوړتیا او د خلکو لپاره د چاپېریالي امنیت د برابرولو په برخه کې د دې پروژې پر اهمیت ټینګار وکړ. هغوی له سیمه ییزو اوسېدونکو څخه هم وغوښتل چې د دې ملي پروژې په ساتنه او پالنه کې جدي همکاري وکړي.
د دهن توتک د ګبیوني دېوال د ترمیم پروژه، د دولتي ادارو ترمنځ د همغږۍ هڅې یو روښانه مثال دی، چې موخه یې د ولسوالیو د بنسټونو پیاوړتیا او د خلکو د ژوند کچې لوړول دي.
نېټه: ۱۴۴۷/۰۱/۰۷ هـ ق
له پېښو سره د مبارزې آمادګۍ ملي اداره
