د سپین بولدک ولسوالۍ اورلګېدنې له امله زیانمنو ته د رسېدنې په اړه غونډه ترسره شوه

نن او تېره ورځ د محرم الحرام په ۲۱ او ۲۲ نېټه د ریاست الوزراء له هدایت سره سم د د پېښو پر وړاندې د چمتووالي ملي ادارې د سرپرست په دفتر کې د بولدک منډی د مشکلاتو د حل په منظور یوه غونډه وشوه چی، په ترکیب کې یې د پېښو پر وړاندې د چمتووالي ملي ادارې سرپرست الحاج ملا نورالدین ترابی، د ریاست الوزراء محترم مقام د دفتر عمومی رییس الحاج ډاکتر ملا عبدالواسع، د سوداګری وزارت معین مولوی احمدالله زاهد، داطفائې عمومی ریس حافظ نورالله، د مرکزي سوداګرۍ خونې استازو هر یو محترم خان جان الکوزی او حاجی ضیاءالدین شتون درلود په غونډه کی په متفرقه ډول او په نوبت واره ډول نظرونه وړاندې شول.
دغه غونډه د قرآن عظیم الشان په څو مبارکو آیتونو سره پیل شوه، او له سیمې څخه د کره سروې، د اورلګېدنې څخه زیانمنو ته د رسېدنې، له سوداګرو او خییرو څخه د مرستو را جلبولو، د سوداګري په مرکزونو او هستوګنځایونو کې د عامه پوهاوي پروګرامونو ترسره کولو، د احتمالي خطرونو پر وړاندې احتیاطي تدابیرو نیولو او د سوداګري مرکزونو لپاره په ماسټر پلان کې د اورلګېدنې پر وړاندې د اړینو تدابیرو نیولو په اړه خبرې وشوې.
همدارنګه پر ملي سوداګرو هم غږ وشو چې په دې برخه کې له زیانمنو سره مرسته وکړي او په غونډه کې ټول موضوعات چې پرې خبرې وشوې، په کتبي ډول د ریاست الوزرا له محترم مقام سره شریک شي.