د ميدان وردګ ولايت له پېښو سره د مبارزې آمادګۍ رياست له خطر سره په مخ سیمو کې د خبرداري لوحې ولګولې
له پېښو سره د مبارزې آمادګۍ ملي ادارې د لوی رئیس، محترم الحاج ملا نورالدين ترابي د لارښوونې پر بنسټ، د ميدان وردګ ولايت له پېښو سره د مبارزې آمادګۍ رياست د ياد ولايت اړوند له خطر سره په مخ سیمو کې د خبرداري لوحو د لګولو لړۍ پیل کړه.
په لومړي پړاو کې، یاد رياست د پل سرخ (سور پل) په سیمه کې د خبرداري یوه لوحه نصب کړه چې موخه يې د لامبو وهلو پر مهال د ډوبېدو د خطر په اړه خلکو ته د پوهاوي ورکول دی، په ګرم موسم کې د سيمې اوسېدونکي او ماشومان د لامبو لپاره دې سيمې ته ورځي چې له امله يې د پېښو د رامنځته کېدو امکان ډېرېږي.
د ميدان وردګ ولایت له پېښو سره د مبارزې آمادګۍ رياست مسؤلين د يو تخنيکي ټيم په ملتيا دا لوحې په هغو سيمو کې ځای پر ځای کوي چې خلکو ته احتمالي خطرونه لري، څو د عامه پوهاوي له لارې د احتمالي تلفاتو کچه راکمه شي.
د دغو لوحو لګول له خلکو سره مرسته کوي چې د خطرناکو سیمو دقيق ځایونه وپېژني او له خطرناکو فعاليتونو څخه ځان وساتي. دا اقدام کولای شي د احتمالي پېښو په مخنيوي کې مهم رول ولوبوي او د سيمې اوسېدونکو لپاره د لا زياتې خونديتوب زمينه برابره کړي.
نېټه: ۱۴۴۷/۶/۰۵ هــ ق
له پېښو سره د مبارزې آمادګۍ ملي اداره
