د میدان وردګ ولایت په نرخ ولسوالۍ کې ۴۰۰ متره د سېلاب لاره پاکه او ګټې اخیستنې ته وسپارل شوه
د میدان وردګ ولایت له پېښو سره د مبارزې آمادګۍ ریاست د دې ولایت د نرخ ولسولۍ په عمرخېل سیمه کې د سېلاب د یوې لارې د پاکولو چارې د ۴۰۰ مترو په اوږدوالي او ۳ متره ژوروالي په درلودلو سره بشپړې او نن ورځ رسما ګټې اخیستنې ته وسپارل شوه.
دا پروژه د میدان وردګ ولایت له پېښو سره د مبارزې آمادګۍ ریاست محترم مولوي احمدشاه ذهین، د اړونده تخنیکي ټیم او د ولسوالۍ د مسؤلینو په شتون کې پرانیستل شوه. د دې پروژې د پلي کېدو په لړۍ کې، له پېښو سره د مبارزې آمادګۍ ریاست ۲۳۵۰ لیټره ډیزل مصرف شول او د ټولګټو محترم ریاست له ماشینرۍ څخه پکې کار واخیستل شو.
د دې پروژې په بشپړېدو سره، د سېلابي لارو د بندېدو جدي ستونزې له منځه یوړل شوې، او اوس مهال د خلکو تګ راتګ د دوه یم ځل لپاره عادي حالت ته را وګرځېدو، دا وقایوي اقدام د شاوخوا ۵۰۰۰ کورنیو، کرنیزو ځمکو، باغونو او له مرکز سره د دایمیرداد او نرخ ولسوالیو د نښلوونکي عمومي سړک د خونديتوب سبب شو.
په ورستیو کې، سیمه ییزو اوسېدونکو له پېښو سره د مبارزې آمادګۍ ملي ادارې د عمومي رئیس محترم الحاج ملا نورالدین ترابي او د میدان وردګ ولایت له پېښو سره د مبارزې آمادګۍ ریاس څخه د دوی د هڅو او پر وخت اقداماتو قدردانی وکړ او د پر وخت رسېدنې له امله یې خوښي څرګنده کړه.
نېټه: ۱۴۴۷/۰۷/۱۸ هـ ق
له پېښو سره د مبارزې آمادګۍ ملي اداره
