د کابل ولایت له پېښو سره د مبارزې آمادګۍ ریاست په استالف ولسوالۍ کې د استنادي دېوال د جوړولو کار پیل کړ
د کابل ولایت له پېښو سره د مبارزې آمادګۍ ریاست د استالف ولسوالۍ په دهن ګذر کلي کې د سېلابونو د خطرونو او د ځاني او مالي زیانونو د مخنیوي په موخه د استنادي دېوال جوړولو د پروژې د بنسټ ډبره د یو شمېر سیمه ییزو مسؤلینو په شتون کې کېښوده.
دا پروژه د عالیقدر امیرالمؤمنین حفظ الله د حکم پر بنسټ، د هېواد له پېښو سره د مبارزې آمادګۍ ملي ادارې له لوري تمویل او پلې کېږي.
د یادونې وړ ده، چې له پېښو سره د مبارزې آمادګۍ ملي ادارې د انجنیرانو لخوا په دهن ګذر کلي کې د زیانمنونکو سیمو سروې ترسره شوې وه، چې یاده سیمه د سېلابونو له خطر سره مخ پېژندل شوې وه او اوس مهال د یو میلیون افغانیو په ارزښټ په همدې سیمه کې د ۹۰ متره په اوږدوالي د استنادي دېوال جوړولو د پروژې کار عملآ پیل شو.
ورته مهال د سیمې خلکو له دې پروژې څخه خوښي څرګنده کړه او د نظام د بقا او ثبات لپاره یې دعا وکړه.
نېټه: ۱۴۴۷/۰۲/۱۹ هـ ق
له پېښو سره د مبارزې آمادګۍ ملي اداره
