د کابل ولایت په دهسبز ولسوالۍ کې د یوه چکډیم د جوړولو کار پیل شو
له پېښو سره د مبارزې آمادګۍ ادارې او د انټرساس مؤسسې ترمنځ د لاسلیک شوې هوکړهلیک پر بنسټ، د کابل ولایت له پېښو سره د مبارزې آمادګۍ ریاست د یادې مؤسسې په مالي ملاتړ، د دهسبز ولسوالۍ د خاص دهسبز په کلي کې د یوه چکډیم د جوړولو کار پیل کړ.
د دې پروژې د پرانیستې په مراسمو کې د کابل ولایت له پېښو سره د مبارزې آمادګۍ رئیس، محترم مولوي نجیبالله انوري، د دهسبز ولسوال محترم حافظ محمد وفا، د کابل ولایت د مقام استازي او د سیمې یو شمېر مشرانو ګډون کړی و.
د کابل ولایت له پېښو سره د مبارزې آمادګۍ محترم رئیس د سیمهییزو مسئولینو او خلکو له همکاریو څخه د مننې ترڅنګ وویل، چې نن د داسې یوه چکډیم د جوړولو د چارو د پیل شاهدان یو، چې په بشپړېدو سره به یې د موسمي سېلابونو له ګواښ څخه د ګڼ شمېر هستوګنیزو کورونو او کرنیزو ځمکو ساتنه وشي، سربېره پر دې به د ځمکې لاندې د اوبو سرچینې او د څو چینو اوبه هم پیاوړې شي، نوموړي زیاته کړه، چې دغه چکډیم به ۶۰ متره اوږدوالی، له ۴ تر ۵ مترو لوړوالی او ۲۰ متره پلنوالی ولري.
همداراز د دهسبز ولسوال د دغې پروژې له پرانیستې څخه خوښي څرګنده کړه او له پېښو سره د مبارزې آمادګۍ ریاست د فعالیتونو د ستاینې ترڅنګ یې وویل، چې دغه اداره تل په سختو ورځو کې د خلکو ترڅنګ ولاړه ده او هر وخت چې خلکو مرستې ته اړتیا لرلې ده، لازمې رسېدنې ترسره شوې دي.
په همدې حال کې د سیمې خلکو هم د دې پروژې د چارو له پیل څخه خوښي څرګنده کړه او ویې ویل، چې د دې پروژې پلي کېدل به د هغوی ګڼې ستونزې هوارې کړي.
نېټه: ۱۴۴۷/۱۱/۲۶ هـ ق
له پېښو سره د مبارزې آمادګۍ اداره
