له پېښو سره د مبارزې آمادګۍ ملي ادارې او د خوړو نړیوال پروګرام (WFP) تخنیکي کمېټې غونډه ترسره کړه
نن ورځ د پنجشنبې سهار، له پېښو سره د مبارزې آمادګۍ ملي ادارې او د خوړو نړیوال پروګرام (WFP) ترمنځ، په یاده اداره کې د همکاریو د اسانتیا او پراختیا په موخه تخنیکي غونډه ترسره شوه.
په دې غونډه کې له پېښو سره د مبارزې آمادګۍ ملي ادارې له لوري د تخنیکي کمېټې مسوول، محترم برهانالدین شینواري، د نړیوالو اړیکو ریاست د اقتصادي همکاریو آمر، احمد سمیر کوهدامني، د پېښو مدیریت د معلوماتو ملي سیستم (NDMIS) آمر، سمیعالله حیات او د بیړنیو حالاتو ریاست رضاکارانو ګډون درلود. همدارنګه د خوړو نړیوال پروګرام له لوري د مرکزي زون مسوول، صدیقالله امین، او د دې پروګرام د همکارو مؤسسو یو شمېر استازو په غونډه کې ګډون درلود.
په دې ناسته کې دواړو لوریو د لاسلیک شوې نقشې لارې په چوکاټ کې د دواړو بنسټونو د همکاریو څرنګوالي، د ګډو بشري فعالیتونو پراختیا، راتلونکو ستراتیژیکو همکاریو، د دې ادارې له رضاکارانو سره د همکارۍ، او د بشري فعالیتونو د لا اسانتیا په اړه بحث وکړ، تر څو خلک وکولای شي له مرستو څخه لا زیاتې ګټې واخلي.
همدارنګه د خوړو نړیوال پروګرام پلاوي، له دې ادارې څخه د مؤسسو لپاره د رامنځته شوو اسانتیاوو له امله خپله خوښي څرګنده کړه او ویې ویل چې د دواړو بنسټونو د کاري همغږۍ او ثبات په نظر کې نیولو سره، دوی ډېره لېوالتیا لري چې په راتلونکي کال کې د ګډو همکاریو تفاهمنامه له دې ادارې سره د خپل اصلي سکتور په توګه لاسلیک کړي.
نېټه:۱۴۴۷/۷/۱۸ هـ ق
له پېښو سره د مبارزې آمادګۍ ملي اداره
