له پېښو سره د مبارزې آمادګۍ ملي ادارې او د کندهار د کډوالو مؤسسې ترمنځ د یو سل او نوي زره او یو سل او شپږ (۱۹۰,۱۰۶) ډالرو په ټولیز ارزښت د ګډو همکاریو تفاهمنامه لاسلیک شوه
نن د چهارشنبې په ورځ له غرمې مخکې، له پېښو سره د مبارزې آمادګۍ ملي ادارې محترم الحاج ملا نورالدین ترابي، په خپل کاري دفتر کې د کندهار د کډوالو مؤسسې د پروګرامونو له مدیر بشیر احمد خالد سره وکتل او د ګډو همکاریو تفاهمنامه یې د یو سل او نوي زره او یو سل او شپږ (۱۹۰,۱۰۶) ډالرو په ټولیز ارزښت ورسره لاسلیک کړه.
محترم ترابي صاحب په دې ناسته کې وویل، چې زموږ هڅه دا ده چې زیانمنو خلکو ته د مرستو وړاندې کولو تر څنګ، د وقایوي پروژو پلي کولو ته پاملرنه زیاته کړو. له همدې امله، موږ مؤسسې او مرستندویه بنسټونه هڅوو چې په دې برخو کې خپلې هڅې پراخې کړي.
په همدې حال کې، د یادې موسسې د پروګرامونو مدیر بشیر احمد خالد د پروژې په اړه معلومات وړاندې کړل او ویې ویل چې په لوګر، کندهار او زابل ولایتونو کې د عامه پوهاوي پروګرامونه ترسره شوي، او په ځینو سیمو کې به د سیلاب د مخکنۍ خبرتیا سیستمونه نصب شي، څو د سیلاب د احتمالي پیښو پر مهال خلک لازم چمتووالی ولري. نوموړي ژمنه وکړه چې پروژه به په شفاف ډول او پر وخت پلي کړي.
د یادونې وړ ده، چې د دې تفاهمنامې له مخې، په لوګر، کندهار او زابل ولایتونو کې لاندې فعالیتونه ترسره کېږي:
1. د GIS یو سیټ برابرول او په یادو ولایتونو کې د زیانمنو سیمو سروې او پېژندنه.
2. د کندهار او زابل ولایتونو په ۶ سیمو کې د مخکنۍ خبرتیا سیستم نصبول، او ۳۰۰ کسانو ته د سیمولیشن تمرینونه او عامه پوهاوی ورکول.
3. د سیستمونو لپاره د پرزو برابرول او د دریېو راتلونکو کلونو لپاره اړوندو کمیټو ته سپارل.
4. په لوګر، کندهار او زابل ولایتونو کې د ۵۰۰ کسانو لپاره د طبیعي پېښو د خطرونو په اړه د ۶ ورځني روزنیز پروګرام ترسره کول.
5. په یادو ولایتونو کې د طبیعي پېښو د خطرونو د مخنیوي لپاره د سیمهییزو کمیټو جوړول.
6. د ۱۰۰۰ کسانو لپاره د طبیعي پېښو د خطرونو د کمولو په اړه د عامي پوهاوي کمپاین ترسره کول.
نېټه: ۱۴۴۷/۶/۵ هـ ق
له پېښو سره د مبارزې آمادګۍ ملي اداره
