له پېښو سره د مبارزې آمادګۍ ملي ادارې سرپرست د افغانستان لپاره کنسرن نړیوالې مؤسسې له رئيس سره وکتل

نن د چهارشنبې سهار، له پېښو سره د مبارزې آمادګۍ ملي ادارې سرپرست، الحاج ملا نورالدین ترابي، په خپل کاري دفتر کې د افغانستان لپاره د کنسرن نړیوالې مؤسسې له رئيس محترم شهزاد جمیل، او د اړیکو او همغږۍ مسوول عبدالحق شریفي سره لیدنه او خبرې وکړې.
په دې ناسته کې، ترابي صاحب د یادې مؤسسې پلاوي ته د ښه راغلاست ویلو ترڅنګ ټینګار وکړ چې افغانستان د خپل جغرافیایي موقعیت له امله تل له بېلابېلو طبیعي پېښو سره مخ دی، چې هر کال د هېوادوالو د ځاني تلفاتو او مالي زیانونو لامل ګرځي. نوموړي له هغو مؤسسو چې د پېښو د مدیریت په برخه کې فعالیت کوي، وغوښتل چې د وقایوي پروژو پلي کولو ته لا ډېره پاملرنه وکړي.
ترابي صاحب زیاته کړه چې موږ به د مؤسسو لپاره لازمې اسانتیاوې برابرې کړو، خو له هغوی څخه هم تمه لرو چې په خپلو کارونو کې شفافیت او چټکتیا راولی.
وروسته، د افغانستان لپاره د کنسرن نړیوالې موسسې رئيس، شهزاد جمیل، له پېښو سره د مبارزې آمادګۍ ملي ادارې له همکاریو مننه وکړه او د یادې موسسې د تېرو پروژو راپور یې وړاندې کړ، او د راتلونکو همکاریو پر دوام یې ټینګار وکړ.
نوموړي همداراز څرګنده کړه چې په راتلونکو پروژو کې به، د بشري مرستو ترڅنګ، د وقایوي پرژو پلي کولو ته هم ځانګړې پاملرنه وکړي.

نیټه: ۱۴۴۶/۸/۲۰
له پېښو سره د مبارزې آمادګۍ ملي اداره