له پېښو سره د مبارزې آمادګۍ ملي ادارې لوی رئیس د زیړي بابا له پنډغالي څخه لیدنه وکړه او د مالیزیا هېواد د طبي مرستو ټولنې له اجرائیه مدیر سره یې وکتل

 له پېښو سره د مبارزې آمادګۍ ملي ادارې لوی رئیس، محترم الحاج ملا نورالدین ترابي، چې د عالیقدر امیرالمؤمنین حفظه الله د لارښوونې پر بنسټ یې کونړ ولایت ته سفر وکړ, په  نورګل ولسوالۍ کې د زیړي بابا له پنډغالي څخه لیدنه وکړه او موجوده ستونزې او ننګونې یې واورېدې.
محترم ترابي صاحب د پنډغالي له بېلابېلو برخو څخه لیدنه وکړه او له مسؤلینو څخه یې د ستونزو له اورېدو وروسته وویل چې سر له سبا څخه به د پنډغالي د تنظیم چارې پیل شي. د هغه په خبره، خېمې به راټولې کړل شي، د خیمو ځای به یو ځل بیا هوار شي او خېمې به په ټاکلي کرښو او یو منظم صف کې ولګول شي. همداراز، که اړتیا وه، د پنډغالي په منځني سړکونو به جغل‌ واچول شي. نوموړي زیاته کړه چې یاد پنډغالی به په جومات، تشنابونو او د څښاک اوبو په اسانتیاوو سمبال شي، څو د زلزله‌ځپلو لپاره لا زیاتې آسانتیاوې رامنځته شي.
په همدې مهال، د ادارې لوی رئیس د مالیزیا هېواد د طبي مرستو ټولنې له اجرائیه مدیر، حافظ احمد امیرول سره وکتل. په دې لیدنه کې د زلزله‌ځپلو لپاره د څښاک اوبو د برابرولو پر چارو خبرې وشوې او په منظم ډول د خدمتونو د پلي کېدو پر همغږۍ ټینګار وشو. د یادې ټولنې مسؤلینو وویل چې د زیړي بابا په پنډغالي کې به د څښاک اوبو د برابرولو لپاره څو څاګانې وکیندل شي.

نېټه: ۱۴۴۷/۳/۲۰ هـ ق
له پېښو سره د مبارزې آمادګۍ ملي اداره