په هرات ولایت کې بېلا بېل ډول ناچاوده توکي کشف او خنثی کړل شول
له پېښو سره د مبارزې آمادګۍ ملي ادارې د ماین پاکۍ د همغږۍ او انسجام ریاست، د هلوټرسټ ماین پاکۍ موسسې د چټک غبرګون او د ماینونواو ناچاودو توکو په اړه د عامه پوهاوي ۲ نمبرټیم د یاد ولایت د شینډنډ ولسوالۍ شوراب کلي ته د ماینونو او ناچاودو توکو له منځه وړلو په موخه ولیږدوه.
د دې عملیاتو په پایله کې، د یاد ټېم له لوري بېلا بېل ډول ناچاوده توکي چی د سېمې اوسېدونکو ژوند یې له ګواښ سره مخ کړی وو، کشف او په خوندي توګه انتقال او له منځه یوړل شول.
سربیره پر دې، د سیمې اوسېدونکو ته د ماینونو او ناچاودو توکو د ګواښونو په اړه د عامه پوهاوي پروګرام هم ترسره شو ترڅو په راتلونکي کې د ماینونو او نا چاوده توکو له امله د احتمالي پېښو مخنیوی وشي.
د یاد ولایت له پېښو سره د مبارزې آمادګۍ ریاست مسؤلینو له خلکو وغوښتل چې د هر ډول چاودېدونکو یا مشکوکو توکو په لیدو سره دې ژر تر ژره د ماین پاکۍ د چټک ځواب ویونکي ټیم شمیرې ۰۷۰۸۶۰۶۰۶۰ سره اړیکه ونیسي ترڅو د خلکو د ځاني او مالي زیانونو څخه د مخنیوي لپاره لازم اقدامات ترسره شي.
نېټه: ۱۴۴۷/۰۳/۱۷ هـ ق
له پېښو سره د مبارزې آمادګۍ ملي اداره
