له پېښو سره د مبارزې آمادګۍ ملي ادارې او اکرو موسسې ترمنځ د ګډو همکاریو تفاهم نامه لاسلیک شوه
نن سهار دوشنبه، له پېښو سره د مبارزې آمادګۍ ملي ادارې سرپرست الحاج ملا نورالدین ترابي په خپل کاري دفتر کې د اکرو موسسې له رئیس مبارکشاه جواد سره وکتل او د یادې موسسې سره یې د ګډو همکاریو تفاهمنامه لاسلیک کړه.
په دې ناسته کې، الحاج ملا نورالدین ترابي د اکرو موسسې پلاوي ته د ښه راغلاست ویلو ترڅنګ وویل چې موږ په ټولو ولایتونو کې ریاستونه او د مرستندویه موسسو او بنسټونو لپاره اړمنو او زیانمنو ته د مرستو رسولو زمینه برابروو. نوموړي د مرستو د وېش په پروسه کې د شفافیت لپاره د همکارۍ ډاډ ورکړ.
وروسته د اکرو موسسې رئیس مبارکشاه جواد له پېښو سره د مبارزې آمادګۍ ملي ادارې سرپرست له همکارۍ مننه وکړه او د خپلې موسسې د فعالیتونو په اړه یې معلومات وړاندې کړل. هغه وویل چې موږ په تېرو ۱۴ کلونو کې د ۲۸ ولایتونو په بېلابېلو برخو کې فعالیت کړی دی او د خپلو مرستو او شفافو فعالیتونو په اړه یې ډاډ ورکړ.
د یادونې وړ ده چې د دې تفاهمنامې له مخې، یاده موسسه به د ارزګان ولایت د دهراود، خاص ارزګان، ګیزاب او چوري ولسوالیو اړوند له بېوزله خلکو سره د ۶۹۹,۳۸۹ ډالرو په ارزښټ مرسته وکړي. په دی ډول چې هغو ۸۰ کورنیو ته چې د طبیعي پېښو له امله یې کورونه ویجاړ شوي، هرې کورنۍ ته به ۵۵۰ ډالر ورکړې او بېوزلو کورنیو ته به د سون توکو لپاره ۲۰۰ ډالر، د ژمنیو جامو لپاره ۷۴ ډالر، او ۵ کمپلې ورکړې.
نېټه:۱۴۴۶/۶/۷
له پېښو سره د مبارزې آمادګۍ ملي اداره
