په لومړۍ ناحیه کې د ښویېدو په حال کې د ډبرو د ویجاړولو چارې چې د خلکو ژوند یې له ګواښ سره مخ کړی دی په چټکۍ سره روانې دي
له پېښو سره د مبارزې آمادګۍ ادارې د پېښو چارو د انسجام معین، محترم الحاج ملا عبدالولي څارنوال (حاجي وارث) د لارښوونې پر بنسټ، چې د کابل ښار او د هېواد په کچه د هغو ډبرو د سروې او ویجاړولو د تخنیکي، مسلکي او باتجربه ټیم مشري کوي چې د خلکو ژوند یې له ګواښ سره مخ کړی و، د کابل ښار د لومړۍ ناحیې، درېیم ګذر، خواجه صفا په سیمه کې د خطرناکو ډبرو د ویجاړولو چارې د دې ادارې د مسلکي او تخنیکي ټیمونو له لوري په چټکۍ سره روانې دي.
د دې پروژې په چوکاټ کې، چې د یادې ادارې د پېښو چارو د انسجام معین په مشرۍ د تخنیکي، مسلکي او باتجربه ټیم له لوري تر سروې او ارزونې وروسته، نن یکشنبه د ۱۴۴۸ هـ.ق کال د محرم الحرام په ۱۲مې نېټې، چې د ۱۴۰۵ لمریز کال د چنګاښ له ۷مې نېټې سره سمون لري، د کابل ښار د لومړۍ ناحیې، درېیم ګذر، خواجه صفا سیمه کې د ۱۳.۶۳ مترمکعب په ټولیز حجم درې ډبرې په خوندي ډول د دې ادارې د مسلکي ټیمونو له خوا ویجاړې شوې.
په همدې حال کې، د سیمې اوسېدونکو څرګنده کړه چې د استوګنې ګڼ شمېر کورونه او نور عامه تأسیسات د دغو ډبرو له جدي ګواښ سره مخ وو، خو اوس د دې خطر لویه برخه له منځه تللې او دغه بهیر د خلکو له هرکلي او ستاینې سره مخ شوی دی.
د یادونې وړ ده چې په کابل ولایت کې د خطرناکو ډبرو د سروې، ارزونې او تخریب لړۍ پیل شوې ده او دغه بهیر به په منظم، پلان شوي او پروګرام شوي ډول د هېواد په کچه دوام ولري، انشاءالله.
یادونه: د کابل ښار او د هېواد د نورو ولایتونو له اوسېدونکو څخه غوښتنه کېږي، که چېرې په هره سیمه کې داسې ډبرې موجودې وي چې د استوګنې پر کورونو یې د رالوېدو خطر موجود وي، نو موضوع دې د اصولو او مقرراتو له مخې د اړوند ګذر د وکیل له لارې تعقیب او وروسته دې په رسمي، تحریري او مکتوبي ډول له پېښو سره د مبارزې آمادګۍ سره شریکه کړي.
