د سمنګان ولایت له پېښو سره د مبارزې آمادګۍ ریاست په خرم سارباغ ولسوالۍ کې د ۴ وقایوي پروژو پلي کولو کار پیل کړ
له پېښو سره د مبارزې آمادګۍ ادارې د مقام او د کډوالۍ نړیوال سازمان (IOM)د دفتر ترمنځ د همغږۍ پر بنسټ، د سمنګان ولایت له پېښو سره د مبارزې آمادګۍ ریاست د یاد سازمان په مالي ملاتړ، د خرم سارباغ ولسوالۍ په بېلابېلو سیمو کې د سیلابونو د خطرونو د کمولو او د خلکو د ژوند او مال د خونديتوب په موخه د څلورو وقایوي پروژو د پلي کولو کار پیل کړ.
په دغو پروژو کې د خرم سارباغ ولسوالۍ په پسحصار کلي کې د ۲۵۰ متره په اوږدوالي او ۳.۲۵ متره لوړوالي استنادي دېوال، په نوآباد لنگر کلي کې د ۴۰ متره په اوږدوالي او ۶ متره لوړوالي استنادي دېوال، په صدمرده کلي کې د ۳۰۰ متره په اوږدوالي او ۴ مترو لوړوالي د ګبیوني دېوال او په چهارسنگ کلي کې د یوه ګبیوني دېوال جوړول شامل دي.
د دغو پروژو په پلي کېدو سره به د سیلابونو د احتمالي زیانونو د کمولو ترڅنګ، د سیمې د اوسېدونکو کرنیزې ځمکې، استوګنیز کورونه او عامه تاسیسات خوندي او د قدرتي پېښو پر وړاندې د خلکو زیانمنتیا راکمه شي.
د سیمې اوسېدونکو د دغو وقایوي پروژو د پیل له امله له پېښو سره د مبارزې آمادګۍ ادارې له مشرتابه، د سمنګان ولایت له پېښو سره د مبارزې آمادګۍ ریاست او IOM سازمان له هڅو څخه مننه او قدرداني وکړه او د دغو پروژو پلي کېدل یې د خلکو د ژوند او مال د خوندیتوب لپاره مهم ګام وباله.
نېټه:۱۴۴۸/۳/۳۰ هـ ق
له پېښو سره د مبارزې آمادګۍ اداره
